Yaponiya Fukushima AES suvini okeanga oqizishni boshladi

Yaponiya hukumati favqulodda holatdagi Fukushima-1 atom elektr stansiyasi reaktorlarini sovitish uchun foydalanilgan tritiyli, tozalangan radioaktiv suvni Tinch okeaniga quyishni boshladi. Bu haqda Kyodo agentligi xabar berdi.

Fukushimada o‘rnatilgan rezervuarlarda taxminan 1,34 million tonna tozalangan suv to‘planib qolgan. Agar suv oqizilmasa, 2024 yilga borib, rezervuarlar to‘ladi.

Tritiyli suv dengiz suvi bilan 1:1200 nisbatda suyultiriladi va qirg‘oqdan taxminan bir kilometr masofada joylashgan quvurlar orqali okeanga oqiziladi. Bundan tashqari, qayta oqizish uchun kundalik cheklov ham bor. Taxminlarga ko‘ra, barcha suv hajmi bosqichma-bosqich, 30 yilda oqizib yuboriladi.

Xalqaro atom energiyasi agentligi (IAEA) bunday jarayon uchun hech qanday to‘siq ko‘rmayapti, u xavfsizlik standartlariga to‘liq mos keladi. Shunga qaramay, jarayon Xitoy va Janubiy Koreyada e’tirozlarga sabab bo‘ldi. Bundan tashqari, Xitoy yapon dengiz mahsulotlari importini to‘xtatganini e’lon qildi.

Fukushima-1 AES avariyasi 2011 yil 11 mart kuni sodir bo‘ldi. Kuchli zilzila va sunami oqibatida stansiyaga zarar yetdi. Avariyaga Xalqaro yadroviy hodisalar shkalasi (INES) bo‘yicha maksimal 7-daraja berilgan edi.

Fukushima-1 AES 2050 yilgacha yopilishi rejalashtirilgan.