Rossiyada bloklangan saytlar soni bir yil ichida 85 foizga oshdi

Rossiyadagi Roskomnadzor so‘roviga ko‘ra, 2023 yilning yanvaridan iyunigacha qonun bilan taqiqlangan ma’lumotlarga ega 885 mingdan ortiq sayt bloklandi yoki o‘chirildi, deya xabar beradi «Kommersant». Bu ko‘rsatkich 2022 yilning birinchi yarmiga nisbatan 85 foizga ko‘p, deb yozadi gazeta 7 sentabr, payshanba kuni. Bunday dinamika o‘tgan yili internet-resurslarni bloklash qilish uchun asoslarning kengayishi, birinchi navbatda, Rossiya armiyasi haqida «feyk» ma’lumotlarning tarqalishini taqiqlash bilan bog‘liq.

Bundan tashqari, internet tarmog‘ida bloklangan yoki o‘chirilgan alohida materiallar soni 1,1 millionga yetdi, bu butun 2022 yilga nisbatan 10 foizga ko‘pdir.

Urush boshlanganidan beri minglab veb-saytlar bloklangan

2022 yil fevralida Rossiya harbiylarining Ukrainada harbiy harakatlari boshlanganidan beri Roskomnadzor Rossiyadagi minglab veb-saytlarni, jumladan, ko‘plab mustaqil ommaviy axborot vositalari, Facebook, Instagram va Twitter ijtimoiy tarmoqlarini blokladi. Tasdiqlanmagan ma’lumotlarga ko‘ra, bloklash YouTube’ga ham ta’sir qilishi mumkin. Bir necha kun oldin Rossiya hukumati bloklashni chetlab o‘tish uchun VPN-yo‘riqnomalari bo‘lgan resurslarni bloklashni taklif etdi.

Bundan tashqari, idora ommaviy axborot vositalaridan qo‘shni davlat bilan urushni «maxsus operatsiya» deb atashni talab qildi, 2022 yil mart oyida esa Rossiya armiyasini «obro‘sizlantirish» va bu haqdagi «feyklar» uchun jazo joriy etildi. Roskomnadzor sudlar, Federal soliq xizmati, Rosmolodej va boshqa idoralarning qarorlari asosida internet-resurslarni bloklaydi. Boshqa narsalar qatorida, Rossiya hukumati mamlakat aholisiga «chet el agentlari» materiallarini o‘qishni taqiqlashga harakat qilmoqda.