Blinken va Berbok Ukrainani kelgusida qo‘llab-quvvatlashga va’da berdi

Germaniya va AQSh Ukrainaga Rossiyadan himoyalanishda yordam berishda davom etadi. Bu haqda 15 sentabr, juma kuni Vashingtonda bo‘lib o‘tgan qo‘shma matbuot anjumanida Germaniya tashqi ishlar vaziri Annalena Berbok va AQSh davlat kotibi Entoni Blinken ma’lum qildi. «Biz Ukrainani, uning xalqini qo‘llab-quvvatlaymiz», deb ta’kidladi Berbok. Uning so‘zlariga ko‘ra, Rossiya «dunyo urushga ko‘nikadi, chunki boshqa muammolar bor» deb hisoblasa, adashadi. 

«Bu dunyoda hech kim shafqatsiz urushga ko‘nikishni xohlamaydi va ko‘nikmaydi ham», - deya qo‘shimcha qildi Germaniya TIV rahbari. «Rossiya Ukrainaning omon qolish irodasini sindira olmaydi, balki faqat ozodlik uchun kurashni kuchaytiradi va xalqaro hamjamiyatning Ukrainadagi har bir inson oxir-oqibat yana erkinlikda yashashi uchun qo‘llab-quvvatlashni davom ettirish qarorini kuchaytiradi», dedi Annalena Berbok. 

Entoni Blinken, o‘z navbatida, AQSh va boshqa o‘nlab davlatlar tomonidan Ukrainaning harbiy, iqtisodiy va humanitar «kuchli qo‘llab-quvvatlashi» to‘xtamasligiga ishontirdi. U Germaniyaga Kiyevni qo‘llab-quvvatlashdagi «yetakchiligi» uchun minnatdorchilik bildirdi. «Yordam hajmi bo‘yicha Germaniya dunyoda AQShdan keyin ikkinchi o‘rinda turadi», - deya ta’kidladi davlat kotibi. 

Berbok: Germaniya hukumati Taurus ta’minoti masalasini «juda jadal o‘rganmoqda» 

Birgalikda o‘tkazilgan matbuot anjumanida Berbok va Blinken Ukrainaga uzoq masofali raketalar yetkazib berish bo‘yicha hali qaror qabul qilmagan o‘z davlatlarining rasmiy pozitsiyasini himoya qildi. Xususan, Germaniyaning Taurus qanotli raketalari haqida gapirar ekan, Berbok «aniqlashtirishni talab qiladigan nozik masalalar» haqida aytib, qurol tizimi «bir qarashda ko‘rinadigan darajada oddiy emas»ligini qo‘shimcha qildi. Shu bilan birga, Germaniya Tashqi ishlar vazirligi rahbari Germaniya hukumati «bu masalani juda jadal o‘rganayotganini» ta’kidladi. 

AQShda Berbok urushda g‘alaba qozonish uchun Ukrainaga yordam berishga chaqirdi 

Avvalroq AQShga amaliy tashrif bilan kelgan Annalena Berbok Fox News telekanaliga bergan intervyusida: «Ukraina bu urushda g‘alaba qozonishi kerak. Ozodlik va demokratiya g‘alaba qozonishi kerak», dedi. Urush qanday tugashi mumkinligi haqidagi savolga Germaniya tashqi ishlar vaziri: «Ukrainada erkinlik va tinchlik bilan. Biz Ukrainani qo‘llab-quvvatlaymiz», dedi.