BMT Bosh assambleyasi rahbari Ukrainaga tinchlikparvarlar yuborilishini istisno etmadi

BMT Bosh assambleyasining yangi raisi Annalena Berbokning so‘zlariga ko‘ra, BMT tinchlikparvar kuchlarining ishtiroki kelajakda Ukrainadagi urushni tartibga solishning bir qismiga aylanishi mumkin. «Agar gap tinchlik shartnomasi haqida ketsa, uni iloji boricha himoya qilish kerak bo‘ladi. Va agar a’zo davlatlarning ko‘pchiligi buning uchun ko‘k dubulg‘alilar kerak, desa, bu tinchlikni uzoq vaqt davomida ta’minlashi mumkin», dedi Germaniya tashqi ishlar vazirligining sobiq rahbari Bild am Sonntag haftaligiga bergan intervyusida.

Berbok birinchi navbatda tinchlik muzokaralari boshlanishi kerakligini ta’kidladi. Ukraina ittifoqchilari bir necha oydan beri ehtimoliy sulh yoki tinchlik shartnomasini ta’minlash variantlarini muhokama qilmoqda, biroq Rossiya haligacha muloqotga kirishish istagini ko‘rsatgani yo‘q.

2022 yil fevral oyidan beri Ukraina Rossiyaning keng ko‘lamli qurolli bosqinini qaytarmoqda. Kiyev sulh tuzilsa yoki urush tugasa, mamlakatga aniq xavfsizlik kafolatlari kerak bo‘lishini ta’kidlamoqda. Harbiy ekspertlar va olimlarning fikricha, buning uchun, masalan, Yevropa ittifoqchilaridan yuz minglab askar kerak bo‘ladi. Birlashgan Millatlar Tashkilotining ko‘k dubulg‘alilar missiyasi muqobil variant sifatida ko‘rib chiqilmoqda.