FIFA reytingi. O‘zbekiston bir pog‘ona pastladi

Sentabr oyidagi natijalarga ko‘ra, O‘zbekiston milliy jamoasi reytingda 75-o‘rinni egallagan. Srechko Katanets shogirdlari avvalgi oyga nisbatan bir pog‘ona pastladi. Vakillarimizning Osiyo qit’asidagi o‘rni esa o‘zgarmagan – 10-o‘rin.

FIFA reytingida ham o‘nlik o‘zgarmadi. Argentina milliy jamoasi 1-o‘rinda bormoqda, Fransiya 2-o‘rin, Braziliya 3-o‘rindan joy olgan. Faqatgina Italiya Portugaliya bilan o‘rin almashgan.

Keyingi o‘rinlarni Angliya (4), Belgiya (5), Xorvatiya (6), Niderlandiya (7), Portugaliya (8), Italiya (9) va Ispaniya (10) o‘nlikdan joy olgan.

Osiyo jamoalari orasida esa Yaponiya reytingda 19-o‘ringa ko‘tarilib, peshqadam sanaladi. Shuningdek, qit’ada top-10likdan Eron (21), Janubiy Koreya (26), Avstraliya (27), Saudiya Arabistoni (57), Qatar (61), Iroq (70), BAA (70), Ummon (73) va O‘zbekiston (75) joy olgan.

Qayd etish joiz, O‘zbekiston milliy jamoasi mart oyida 74-o‘ringa ko‘tarilib, oxirgi 5 yillikdagi eng yaxshi natijasiga erishgandi. Bungacha vakillarimiz 2018 yil fevral oyida 72-o‘ringa ko‘tarilgan, shundan so‘ng 95, 84, 83, 82, 77-o‘rinlarni egallagandi.

Eslatib o‘tamiz, O‘zbekiston milliy jamoasi 10 sentabr kuni AQShga 0:3 hisobida mag‘lub bo‘ldi, 13 sentabrda esa KONKAKAF chempioni Meksika milliy jamoasi bilan durang (3:3) qayd etdi.