Checheniston yetakchisi Ramzan Qodirov Moskvada Rossiya prezidenti Vladimir Putin bilan uchrashdi. Bu haqda Kreml rasmiy sayti xabar bermoqda.
«Xayrli kun, Ramzan Axmatovich. Siz bilan bugun Chechenistondagi iqtisodiy va ijtimoiy vaziyat haqida gaplashishga kelishib olgandik. Umuman olganda, vaziyat ijobiy. Bunda siz va jamoangizning hissasi katta. Bizda siz doim aytadigan mavzulardagi qator jiddiy dastur va vazifalar bor. Bilaman, uchrashuvda savollar tayyorlab kelgansiz. Marhamat», deb Putinning so‘zlarini keltirgan Kreml rasmiy sayti.
«Vladimir Vladimirovich, uchrashishga vaqt ajratganingiz uchun rahmat. Respublikadagi vaziyat haqida gapirishdan avval maxsus harbiy amaliyot boshlanganidan hozirgacha nimalar qilganimiz haqida gapirsam. Gumanitar va jang maydonidagi harakatlarimiz bilan biroz maqtanmoqchiman ham.
Otryadimiz yaxshi natijalar ko‘rsatmoqda, har kuni asir olinyapti, texnikalar yo‘q qilinyapti. «Abrams»lar biz uchun qo‘rqinchli emas. Biz ularga «reklama» qilib berdik desam ham bo‘ladi.
Jangchilarning kayfiyati yaxshi. Ularning barcha muammolarini hal qilyapmiz: aloqa, texnika bilan bog‘liq. Operatsiya boshidan buyon 1100 dan ortiq mashina sotib oldik, ularning 100 dan ortig‘i zirhli mashinalar. Respublikadan turib boshqalarga ham yordam beryapmiz, axir bu umumiy ishimiz, birgalikda g‘alaba qozonishimiz kerak», degan Qodirov Putin bilan uchrashuvda.
Kreml e’lon qilgan xabarda u yana to‘ldirilishi aytilgan.
Ma’lumot uchun, Ramzan Qodirov salomatligi yomonlashgani haqida xabarlar fonida Putin bilan birinchi marta ko‘rishdi. Shuningdek, 25 sentabr kuni Qodirov o‘z kanalida o‘g‘li Adam Qodirov Qur’oni karim nusxasini yoqqani uchun hibsga olingan Nikita Juravlevni tergov hibsxonasida kaltaklagani aks etgan video e’lon qilgach, uning atrofida navbatdagi mojaro avj olgandi.
