Davlat budjeti mablag‘lari hisobidan qoplanadigan tibbiy yordamning kafolatlangan hajmi belgilandi

Ushbu ro‘yxatda oilaviy shifokor punktlari, oilaviy poliklinikalar, ko‘p tarmoqli markaziy poliklinikalar, tuman (shahar) markaziy shifoxonalarida (jumladan, tug‘uruq majmualarida) ko‘rsatiladigan tibbiy yordamning kafolatlangan hajmlari belgilandi.

Ushbu hujjat qabul qilinishi natijasida fuqarolarga ro‘yxatda nazarda tutilgan tibbiy yordamni davlat hisobidan olish imkonini beradi.

Xususan, ro‘yxatda quyidagilar nazarda tutilgan:

- tibbiyot muassasalarida ko‘rsatiladigan tibbiy yordamning kafolatlangan hajmlari (masalan, Haj va Umra ziyoratiga boradigan shaxslarni ruhiy-asab, narkologiya, teri-tanosil, sil kasalliklari va boshqa kasalliklarni aniqlash yuzasidan tibbiy ko‘rikdan o‘tkazish, shuningdek emlash, hayotga xavf soladigan holatlarda (asfiksiya, yurak to‘xtashi, anafilaktik shok va boshqalar) tibbiy yordam ko‘rsatish, profilaktik ko‘riklar va skrining tekshiruvlari);

- tibbiyot muassasalarida ko‘rsatiladigan tibbiy yordamning kafolatlangan hajmlariga kiritilgan tashxislar (masalan, yurakning gipertenziv kasalligi, yurak surunkali ishemik kasalligi, oshqozon yara kasalligi, o‘n ikki barmoqli ichak yara kasalligi, jigar sirrozi);

- dori vositalari va tibbiy buyumlar (masalan, analeptiklar, balg‘am ko‘chiruvchi vositalar, antidepressantlar, tibbiy bintlar, tibbiyot pipetkalari, qo‘lqoplar).

Qayd qilinishicha, Konstitutsiyasining 48-moddasida har kim sog‘lig‘ini saqlash va malakali tibbiy xizmatdan foydalanish huquqiga ega ekani va fuqarolar tibbiy yordamning kafolatlangan hajmini belgilangan tartibda davlat hisobidan olishga haqli ekani belgilangan.