Koreya Farg‘onada O‘zbekistondagi ikkinchi golf maydonini qurish loyihasini ishlab chiqmoqda

Farg‘ona viloyati hokimligida Janubiy Koreyaning Dream Build Team kompaniyasi rahbari Pak Yong Shik hamda Incense Korea kompaniyasi rahbari Yu Li Bok bilan uchrashuv bo‘lib o‘tdi.

Viloyat hokimligi ma’lumotiga ko‘ra, uchrashuvda Farg‘ona viloyatida to‘g‘ridan to‘g‘ri Janubiy Koreya sarmoyalari hisobiga amalga oshirish rejalashtirilayotgan investitsion loyihalar, turizm va boshqa sohalarda hamkorlik istiqbollari atroflicha muhokama qilindi. Ekoshahar majmuasining tegishli kichik sanoat zonasi hududida «Koreys ishlab chiqaruvchilari sanoat parki» tashkil etish bo‘yicha ishlarning borishi ham uchrashuv asosiy kun tartibidan o‘rin oldi. 

Dream Build Team kompaniyasi Quva tumani hududida golf maydoni tashkil etish loyihasini ishlab chiqmoqda. Viloyat hokimi boshchiligidagi Farg‘ona delegatsiyasining joriy yil mart oyida Janubiy Koreyaga tashrifi davomida bu borada muzokaralar o‘tkazilgan. Loyiha istiqbolini hamda viloyatdagi infratuzilmalarni yuqori baholagan Pak Yong Shik, O‘zbekistondagi ikkinchi golf maydonining barpo etilishi Farg‘onaga Koreyadan, shuningdek, boshqa xorijiy davlatlardan, Yevropadan ko‘plab golf ishqibozlarini jalb etishiga ishonch bildirdi. Dream Build Team kompaniyasi rahbari bilan shuningdek, Ekoshahar hududida biznes markazi barpo etish loyihasi bo‘yicha muhokamalar o‘tkazildi.

Incense Korea kompaniyasi rahbari Yu Li Bok boshchiligidagi o‘nlab investorlardan iborat guruh, mart oyidagi viloyat delegatsiyasining Koreyaga tashrifi ortidan aprel oyida Farg‘onaga kelib, viloyatning iqtisodiy salohiyati bilan joyida tanishishgan. Tashrif natijasida Ekoshahar majmuasining tegishli kichik sanoat zonasi hududida «Koreys ishlab chiqaruvchilari sanoat parki» tashkil etish bo‘yicha dastlabki kelishuvlarga erishilgan. Uchrashuvda Yu Li Bok ushbu sanoat parkida joylashtirish ko‘zda tutilayotgan investitsion loyihalarni ishlab chiqilayotgani haqida viloyat rahbariga ma’lumot berdi. 

Shuningdek, Incense Korea kompaniyasi tomonidan Toshkent-Farg‘ona avtomagistral yo‘li bo‘yida Janubiy Koreya standartlariga mos, savdo, mehmonxona, ovqatlanish va logistika xizmatlarini o‘z ichiga olgan ko‘p tarmoqli xizmat ko‘rsatish markazi barpo etish loyihasi taqdim etildi.

Uchrashuvda misni chuqur qayta ishlash, pulli yo‘llar qurish, turistik obektlar barpo etish loyihalari bo‘yicha investitsion hamkorlik bo‘yicha fikr almashildi. Ta’lim sohasida hamkorlik bo‘yicha qo‘shma loyihalarni amalga oshirishda koreyalik investorlarning ijtimoiy hamkorligi bo‘yicha kelishib olindi.