Maktab direktori lavozimiga nomzodlar menejyerlik o‘quv kurslarida o‘qitiladi

Maktab direktorlarining vakant lavozimlariga nomzodlar faqat sertifikati mavjud va zaxiraga kiritilgan kadrlar orasidan tanlab olinadi.

Foto: Kun.uz

“Umumiy o‘rta ta’lim muassasalari direktori lavozimiga nomzodlarni menejyerlik o‘quv kurslarida o‘qitish va ularga menejyerlik sertifikatini berish tartibi to‘g‘risida nizomni tasdiqlash haqida”gi hukumat qarori loyihasi e’lon qilindi.

Umumiy o‘rta ta’lim muassasalari direktori lavozimiga nomzodlarni menejyerlik o‘quv kurslarida o‘qitish va ularga menejyerlik sertifikatini berish tartibi to‘g‘risida nizom tasdiqlanadi.

Maktabgacha va maktab ta’limi vazirligi 2024 yil 1 yanvardan boshlab A.Avloniy nomidagi pedagoglarni kasbiy rivojlantirish va yangi metodikalarga o‘rgatish milliy-tadqiqot institutida umumiy o‘rta ta’lim muassasalari direktor lavozimiga nomzodlarni menejyerlik o‘quv kurslarida o‘qitish va maxsus portal orqali ularga davlat namunasidagi menejyerlik sertifikatini elektron raqamli imzo bilan tasdiqlangan va QR-kod qo‘yilgan elektron shaklda berish tizimini joriy qiladi.

Qoraqalpog‘iston Respublikasi Maktabgacha va maktab ta’limi vazirligi, viloyatlar va Toshkent shahri maktabgacha va maktab ta’limi boshqarmalari tomonidan menejyerlik sertifikatiga ega nomzodlardan maktab direktorlari zaxirasi shakllantiriladi.

Bunda, maktab direktorlarining vakant lavozimlariga nomzodlar faqat sertifikati mavjud va zaxiraga kiritilgan kadrlar orasidan tanlab olinadi.

#direktor #maktab