Telegram Android va Apple uchun HAMAS kanalini blokladi

Bloklash HAMAS harbiy qanoti «Izzaddin al-Qassam brigadasi»ning rasmiy Telegram-kanaliga ham ta’sir ko‘rsatdi.

Foto: Kun.uz

Telegram messenjeri 24 oktyabr, seshanba kuni Android va Apple operatsion tizimlari foydalanuvchilari uchun Falastinning HAMAS guruhi rasmiy kanaliga kirishni chekladi.

TASS agentligining xabar berishicha, HAMAS kanali Google Play qoidalariga muvofiq Android foydalanuvchilari uchun bloklangan.

Agentlik ma’lumotlariga ko‘ra, HAMAS harbiy qanoti «Izzaddin al-Qassam brigadasi»ning Telegram-kanali ham bloklangan. Shu bilan birga, boshqa harakatlar vakillarining va Livandagi «Hizbulloh» harakatining rasmiy kanallari hamon ishlayapti.

Bloklangan resurslarga kirishni tiklash uchun Telegram foydalanuvchilarga mobil ilovani ilovalar do‘konlari orqali emas, balki messenjerning rasmiy veb-saytidan yuklab olishni taklif qildi. Bloklangan kanallar Telegram veb-versiyasida ham mavjud.

13 oktyabr kuni Telegram asoschisi Pavel Durov messenjer HAMAS kanaliga kirishni cheklamasligini aytgandi, chunki Yaqin Sharqdagi «jangovar zonada sodir bo‘layotgan voqealar haqida ma’lumot berish bilan bog‘liq vaziyat yomonlashishi» mumkin. Uning eslatishicha, HAMAS messenjerdan tinch aholini shaharga raketa hujumlarini uyushtirishdan oldin Ashkelonni tark etish zarurligi haqida ogohlantirish uchun foydalangan.

Tayyorlagan Отабек Матназаров

#Telegram #Hamas

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.