Shu yil 24-25 oktyabr kunlari prezident Shavkat Mirziyoyev joylarda islohotlarning borishi, hududlar rivoji hamda aholi turmush tarzi bilan yaqindan tanishish maqsadida Qashqadaryo viloyatida bo‘lgandi.
Safar davomida davlat rahbari ta’lim va tibbiyot muassasalari va mahallalarga tashrif buyurib, viloyatni ijtimoiy-iqtisodiy rivojlantirish yuzasidan yig‘ilish o‘tkazdi. Unda ko‘plab sohalar qatori tibbiyotni aholiga yaqinlashtirish, soha oldida turgan muhim masalalarni hal etish bo‘yicha qator vazifalarni o‘rtaga tashladi.
Bugun, 28 oktyabr kuni Qashqadaryoda viloyat hokimi M. Azimov va Sog‘liqni saqlash vaziri A. Inoyatov ishtirokida prezident tomonidan belgilab berilgan ushbu topshiriqlar ijrosiga bag‘ishlangan yig‘ilish bo‘lib o‘tdi.
Tanqidiy va tahliliy ruhda o‘tgan majlis avvalida davlat rahbari tomonidan belgilab berilgan vazifalar haqida so‘z yuritilib, uning mexanizmlari va mazmun-mohiyatini mas’ullar hamda aholiga yetkazish, har bir topshiriqni to‘liq amalga oshirish zarurligi alohida qayd etilgan.
«Shu o‘rinda aytish lozim, bugun Qashqadaryo viloyatidagi mavjud 2 ta shahar va 14 ta tumanda 3,5 million nafar aholi istiqomat qiladi. Hududda ayni paytda 319 ta davlat tibbiyot muassasasi, jumladan, 19 ta viloyat davolash maskani, 16 ta tuman-shahar tibbiyot birlashmasi, 82 ta oilaviy poliklinika, 103 ta oilaviy shifokorlik punkti va 95 ta mahalla tibbiyot punkti faoliyat yuritmoqda.
Keyingi yillarda viloyatda tibbiy xizmatlar sifati va qamrovini oshirish borasida sezilarli natijalarga erishilmoqda. Biroq sohada yechimini kutayotgan masalalar talaygina.
Misol uchun, joriy yilda ro‘yxatga olingan 1,6 ming nafar bemorning 979 nafarida onkologiyaning kechki bosqichi aniqlangan. Qolaversa, ayni paytda hudud aholisining 42 foizida ortiqcha vazn muammosi sabab yurak qon-tomir va qandli diabet bilan kasallanishlar soni ortgan.
Prezidentimiz Qashqadaryo viloyatiga tashrifi davomida bu holatdan tashvish bildirib, odamlar orasida sog‘lom turmush tarzi targ‘ibotini kuchaytirish, viloyatda sog‘liqni saqlash tizimi salohiyatini oshirish zarurligini alohida ta’kidladi», deyiladi SSV matbuot xizmati xabarida.
Yig‘ilishda vazir mazkur masalaga to‘xtalib, buning uchun, eng avvalo, aholi orasida to‘g‘ri va sog‘lom ovqatlanishni yo‘lga qo‘yish, har bir insonning o‘z salomatligiga mas’ulligini oshirish va bu borada tibbiyot xodimlari hamda soha mas’ullari xalqqa eng yaqin ko‘makchi va suyanch bo‘lishi lozimligini qayd etgan.
