Rossiyada qatag‘on qurbonlari xotirasiga bag‘ishlangan aksiya o‘tkazildi

Rossiyada 29 oktyabr, yakshanba kuni SSSRdagi siyosiy qatag‘on qurbonlari xotirasiga bag‘ishlangan «Ismlarning qaytishi» tadbiri bo‘lib o‘tdi. Faollar qurbonlarning ismlarini o‘qib berdi. «Memorial» inson huquqlari harakati va «Meduza» nashri xabariga ko‘ra, tadbir Rossiyaning 21 shahrida bo‘lib o‘tdi.

Moskvada aksiya taqiqlandi, politsiya Lubyanka maydonini va Solovetskiy toshiga o‘tishni to‘sib qo‘ydi. To‘siqdan o‘tishga uch yoki to‘rt kishiga ruxsat berildi. Solovetskiy toshiga gul qo‘yish uchun kelganlar orasida «Memorial» hamraisi Oleg Orlov va jamiyat boshqaruvi raisi Yan Rachinskiy, Yevropa Ittifoqi, AQSh va boshqa davlatlar diplomatlari bor edi.

«Ismlarning qaytishi» tadbiri bo‘yicha uzoq yillik an’ana

2007 yildan beri har yili 29 oktyabr kuni Solovetskiy toshida odamlar kun bo‘yi navbatma-navbat sovet tuzumi siyosiy qatag‘on qurbonlarining ismlarini o‘qib beradi. 2020 yildan boshlab rasmiylar koronavirus pandemiyasi bahonasida «Ismlarning qaytishi»ga ruxsat berishni rad eta boshladi.

Bu yil Moskva meriyasi koronavirus cheklovlari sabab, «Memorial»ga tadbir o‘tkazishni yana taqiqladi.

Jozep Borrelning bayonoti

Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel o‘z bayonotida Rossiyadagi siyosiy qatag‘on qurbonlari xotirasiga hurmat bajo keltirdi hamda «qurbonlar xotirasini saqlab qolish va ularni manipulyatsiya qilish va o‘chirishga urinishlarning oldini olish bo‘yicha faoliyatni davom ettirayotganlarning xizmatlarini» yuqori baholadi. 

«O‘tgan yillar davomida biz inson huquqlariga nisbatan hurmatsizlikning guvohi bo‘ldik. «Memorial» kabi tashkilotlarning taqiqlanishi Rossiya va Yevropaning qolgan qismi uchun tuzatib bo‘lmas yo‘qotish bo‘ldi», - dedi Borrel.

Muxolifat, faollar, mustaqil ommaviy axborot vositalari, jurnalistlar va tanqidiy ovozlarga nisbatan kuchayib borayotgan repressiyalarni tanqid qilgan Borrel barcha siyosiy mahbuslarni, jumladan Yuriy Dmitriyev, Vladimir Kara-Murza, Ilya Yashin, Aleksey Gorinov, Ivan Safronov va Aleksey Navalniyni zudlik bilan ozod qilishga chaqirdi.