Ispaniyada grandlar ta’qibchi rolida, London jamoalarida qiyin davr boshlanmoqda. Hafta o‘yinlari anonsi
|20:58 / 11.11.202322 32424 min
«Tottenhem» o‘tgan turdagi, «Yunayted» Kopenhagendagi dramani qanchalik tez unuta oladi, Germaniyaning uchinchi jamoasi qaysi? Rimning birinchi jamoasichi? Ispaniya grandlari yetakchilikka qayta oladimi? Milliy jamoalar ishtirokidagi navbatdagi uchrashuvlardan oldin yana ikki kun klublar ijrosidagi shiddatli bahslar guvohi bo‘lishimiz mumkin.
Foto: Global Look PressFoto: Global Look Press
«VULVeRHEMPTON» – «TOTTeNHEM» (11 noyabr, 17:30)
Bemalol aytish mumkinki, «Tottenhem» APLda mavsum starti kashfiyoti bo‘ldi. Bejiz Pasteko‘g‘li qatorasiga uch marta oyning eng yaxshi murabbiyi bo‘lgani yo‘q. Ammo jamoa haqiqiy sinovlar arafasida turibdi. «Chelsi» bilan o‘yin shunchaki mag‘lubiyat, yo‘qotilgan ochkolar emas, oqibatlar nuqtayi nazaridan ham muhim bo‘ldi. O‘yin jihatidan hatto to‘qqiz kishi qolganda ham «Tottenhem» yomon ko‘rinmadi, ammo ushbu o‘yindagi jarohatlar va diskvalifikatsiyalar navbatdagi o‘yinlarda ta’sir qilishi shubhasiz.
Asosiy markaziy himoyachilar Romero (diskvalifikatsiya) va van de Veyn (jarohat) maydonga tusha olishmaydi. Yana bir himoyachi Iyenoma Udoji ham «Chelsi»ga qarshi o‘yinda maydondan chetlatilgandi. Jamoaning hujum chizig‘idagi asosiy ijrochilaridan biri Jyeyms Meddisonning ham jarohati jiddiy bo‘lib chiqdi – u hatto yil oxirigacha sheriklariga yordam bera olmasligi mumkin. Buning ustiga rotatsion shaklda o‘rinlarni to‘ldirishi mumkin bo‘lgan Perishich, Risharlison, Solomon, Sessenon kabi futbolchilar ham turli jarohatlar tufayli maydonga tusha olmaydi. Tabiiyki, yangi qurilayotgan va bir yo‘lga tushib olgan jamoa uchun bu yo‘qotishlarning o‘rni katta bo‘ladi. Oldinda esa «Vulverhempton»dan tashqari, «Aston Villa», «Manchester Siti», «Nyukasl» kabi raqiblar kutib turibdi.
«Bo‘rilar» turnir jadvalida pastki o‘rinlarda borayotgan bo‘lsa-da, ayniqsa, katta jamoalarga qarshi o‘yinlarda bemalol qarshilik ko‘rsata olishini isbotlab ulgurishdi. Jamoa «Siti»ni mag‘lub etdi, «Nyukasl» bilan o‘yinda durangga erishdi. O‘z maydonidagi o‘yinlarda jamoa doim xavfli raqib bo‘lib kelgan. Xususan, o‘tgan mavsumdagi o‘zaro o‘yinda ham mezbonlar kichik hisobda g‘alaba qozonganini eslash mumkin.
«Vulverhempton» tarkibida jarohatlar nisbatan kamroq, ammo Pedru Netuning o‘zi katta yo‘qotish bo‘lishi kerak. Dastlabki turlarda u nafaqat jamoa safida, umuman APLda ham ko‘p ko‘rsatkichlar bo‘yicha eng yaxshilardan bo‘lgandi. U milliy jamoalar bilan bog‘liq tanaffusdan keyingina mashg‘ulotlarga qaytishi mumkin. Shuningdek, Bueno ham «Tottenhem»ga qarshi maydonga tusha olmaydi.
«CheLSI» – «MANCheSTeR SITI» (12 noyabr, 21:30)
«Chelsi» uchun sinov davri davom etyapti – o‘tgan turda peshqadam «Tottenhem», bu safar yangi peshqadam «Manchester Siti», tanaffusdan keyin hali «Brayton», «Nyukasl», «MYu» kabi raqiblar kutib turibdi. To‘g‘ri, birinchi bosqichdan yaxshi o‘tildi, «Tottenhem» ustidan 4:1 hisobidagi g‘alaba katta natija, ammo shuni ham unutmaslik kerakki, Pochettino shogirdlari bir kishi ko‘p bo‘lib qolgandagina hisobni tenglashtirishdi, keyingi uch gol esa, umuman raqib 9 kishi qolganda qarshi hujumlarda urildi. Baribir, «Chelsi» o‘yiniga hali savollar ko‘pligi, o‘tgan turdagi g‘alaba uch ochkodan boshqa u qadar ko‘p ijobiy xulosalarga sabab bo‘lmaganini e’tiborga olish kerak.
Mavzuga oid
«Manchester Siti» umuman boshqa daraja, ayniqsa, so‘nggi o‘yinlarda Gvardiola shogirdlari rostanam «quturib» ketishdi. Barcha musobaqalarda qatorasiga 5 g‘alaba, uchtasi yirik hisobda, jami 17 ta gol urildi. 7 gol Holland tomonidan urilgan, ammo u tanaffusda almashtirilganida ham, «Bornmut» darvozasiga 6 gol yo‘llangan. Ya’ni manchesterliklar o‘yini ancha rang-baranglashib bormoqda va xavf qaysi tomondan kelishini payqash oson emas. «Chelsi» shu paytgacha «Liverpul» va «Arsenal» bilan o‘ynab ulgurgan bo‘lsa-da, tan olish kerak, o‘sha o‘yinlarda raqiblarda muammolar kuzatilgandi, xo‘p, shunday o‘ynashga Pochettino rejasi ta’sir qilgan deb hisoblagan taqdirimizda ham, «Manchester Siti» yuqoriroq darajadagi sinov bo‘lishini tan olishimiz kerak.
Yana bir qiziq fakt. Gvardiola aynan «Chelsi»ga qarshi o‘yinlarda ancha jiddiy va pragmatik tayyorgarlik ko‘radigandek tuyuladi. Esingizda bo‘lsa, ikki yarim yil oldin londonliklar YeChL finalida «Manchester Siti»ni mag‘lub etgan va Gvardiolaning YeChL orzusini ikki yilga kechiktirgandi. Lekin o‘sha o‘yindan beri «Chelsi» Gvardiola jamoasiga qarshi o‘yinlarda ochko olish uyoqda tursin, hatto birorta gol ham urolmay kelyapti. 6 o‘yin, 6 mag‘lubiyat, to‘plar nisbati – 0:10. O‘sha finaldan oldin esa «Chelsi» qatorasiga uch o‘yinda ushbu raqibini mag‘lub eta olgandi. Balki, nihoyat Pochettino ushbu qora an’anaga chek qo‘yar?
O‘yin Londonda bo‘layotgani, «Siti» hafta o‘rtasida YeChL doirasidagi uchrashuvda maydonga tushgani, Stounz, Akanji kabi futbolchilarning jarohati «Chelsi»ning imkoniyatlarini biroz oshirishi mumkin. Shuningdek, mezbonlar tarkibida Palmer va Sterling o‘z vaqtida «shaharliklar» tarkibida o‘ynagan va sotib yuborilgan. Bu futbolchilarda o‘zini ko‘rsatib, Gvardiolaning qarori xato bo‘lganini isbotlash imkoniyati bor.
Navbatdagi tur arafasida turnir jadvalidagi holat:
12 noyabrga o‘tar kechasi «Real» Ispaniya chempionatining 13-turida «Valensiya»ni qabul qiladi. «Santiyago Bernabeu» stadionidagi o‘yin Toshkent vaqti bilan soat 01.00 da boshlanadi.
Klasikoda «Barsa» ustidan qozonilgan irodali g‘alabadan (2:1) keyin Karlo Anchelotti yigitlari kutilmaganda «Rayo Valekano»ga ochko sovg‘a qildi (0:0). «Asalarilar» jamoasi «Santiyago Bernabeu»da 23 yil ichida ilk bor ochkoga ega bo‘ldi — 2000 yil martidagi o‘yinda ham golsiz durang qayd etilgandi. Mehmonlar omad tufayli shunday natijaga erishdi: ular mezbonlar darvozasi tomon biror marta zarba yo‘llamadi va kutilgan gollar statistikasi (xG) bo‘yicha ham yaqqol ortda qoldi — 2,05 ga qarshi 0,16. Madridliklar mavsumda ilk bor o‘yinni golsiz yakunlashdi va «Jirona»dan ikki ochkoga ortda qoldi — bungacha Kataloniyaning ushbu jamoasi turnir jadvalidagi peshqadamlikni «blankoslar» bilan bo‘lishib turgandi.
«Real» o‘tgan turda ochkolardan tashqari Jud Bellinghemni ham yo‘qotishiga bir baxya qoldi — angliyalik futbolchi raqib bilan havodagi yakkakurashdan keyin gazonga noqulay yiqildi va yelkasini shikastlab oldi. Jarohat jiddiy bo‘lib chiqmadi, ammo ehtiyotkorlik chorasi sifatida Anchelotti uni YeChLning 4-tur o‘yiniga tushirmadi. «Braga» bilan o‘yinda ispanlar Judsiz ham amallashdi — Braim Dias, Vinisius va Rodrigo bittadan gol urdi va klub muddatidan oldin asosiy yevrokubokning pley-off bosqichiga chiqdi. Andrey Lunin o‘sha o‘yin boshida penalti qaytardi, holbuki u boshlang‘ich tarkibda tushishi rejalashtirilmagandi — Kepa Arrisabalaga mashg‘ulot vaqtida jarohatlangani tufayli ukrainalik darvozabon o‘yin amaliyotiga ega bo‘ldi. «Valensiya»ga qarshi o‘yinda ham darvozani Lunin qo‘riqlaydi — tibbiy ko‘rikdan keyin ispaniyalik posbon bel qismidagi mushaklarni jarohatlab olgani va ikki-uch haftaga safdan chiqqani ma’lum bo‘lgan. «Ko‘rshapalaklar»ga qarshi o‘yinda Antonio Ryudiger ham qatnashmaydi — germaniyalik himoyachining sariq kartochkalari soni ortib ketgan.
Ruben Baraxa jamoasi Madridga besh uchrashuvdan iborat mag‘lubiyatsiz seriya bilan kelmoqda. O‘tgan haftada jamoa Ispaniya kubogida «Logrones»ni (2:0), la ligada «Granada»ni (1:0) mag‘lub etdi. Bungacha la liganing uch turida ham valensiyaliklar ochkolarga ega bo‘lgandi — safarda «Malliorka» (1:1) va «Atletik»ka qarshi o‘yinlardagi duranglar (2:2) oralig‘ida uyda «Kadis» ustidan g‘alaba qozonilgandi (2:0).
Lekin «ko‘rshapalaklar» jamoasining Madridga so‘nggi tashriflari noxush yakunlangan: so‘nggi besh tashrifda ikki va undan ortiq gol farqi bilan mag‘lubiyatga uchralgan. «Rayo Valekano»ga qarshi o‘yindagi ochko yo‘qotish qaymoqranglilarni diqqatni jamlab o‘ynashga va vaziyatlarni ko‘kka sovurmaslikka undashi tayin — «Jirona»ni quvib yetish kerak. Jud Bellinghem hafta o‘rtasida dam oldi va yangi qahramonliklar ko‘rsatishga tayyor, «Braga»ga qarshi o‘yin ko‘rsatdiki, Vinisius va Rodrigo ham formasini yaxshilab bormoqda. Qolaversa, bu milliy jamoalar o‘yinlari tufayli yuzaga keladigan tanaffusdan oldingi oxirgi o‘yin — «blankos» tanaffusga yorqin o‘yin bilan chiqib ketishni rejalashtirayotgani tayin. Masalan, bir oy oldin shunday o‘yinda «Osasuna» yirik hisobda taslim etilgandi (4:0).
«BARSeLONA» — «ALAVeS» (12 noyabr, 20:15)
12 noyabr kuni «Barselona» va «Alaves» Ispaniya chempionatining 13-turi doirasida to‘qnashadi. O‘yin Kataloniyadagi Olimpiya stadionida, Toshkent vaqti bilan soat 20.15 da boshlanadi.
Kataloniyaliklar barcha turnirlar doirasidagi so‘nggi uch o‘yindan ikkitasida mag‘lub bo‘lishdi — bungacha Xavi shogirdlari 13 o‘yinda yutqazmagandi. Ko‘k-anorranglilar klasikoda «Real»ga (1:2), YeChLda «Shaxtyor»ga yutqazdi (0:1). Bu muvaffaqiyatsizliklar orasida «Barselona» chempionat o‘yinida «Real Sosiyedad»ni qiyinchilik bilan yengdi (1:0).
Jamoa o‘ziga ishonchni qaytarishi uchun «Alaves» mos raqib deyish mumkin. Basklar la ligada 14-pog‘onada bormoqda va 12 turda olti marta yutqazgan. Qolaversa, kataloniyaliklar o‘zaro uchrashuvlarda katta ustunlikka ega — chempionatdagi so‘nggi 10 o‘yindan sakkiztasida g‘alaba, ikkitasida durang qayd etilgan (shu bilan birga, Kataloniyadagi oxirgi o‘yin 1:1 hisobida yakunlangandi). Deportivoliklar tarixdagi jami 45 o‘yindan faqat yettitasida g‘alabani nishonlagan, so‘nggisi — 2016 yilda, o‘shanda bu «Kamp Nou»da ro‘y bergandi (2:1).
Qo‘shimchasiga bu mavsumda mehmonlar la ligada hammadan kamroq gol urayotgan jamoalar safida. 12 turda «Alaves» atigi 10 gol urishga erishgan, «Las-Palmas» va «Kadis»da ham shunday ko‘rsatkich. «Barselona» esa ko‘p gol urish bo‘yicha chempionatda uchinchi natijani qayd etmoqda: kataloniyaliklar raqiblar darvozalarini 24 bor ishg‘ol etgan, bu o‘rtacha 90 daqiqaga ikki gol degani. Faqat «Atletiko» (26) va «Jirona»da ko‘proq (29).
Shu bilan birga, ko‘k-anorranglilarning hujum chizig‘ida yaqqol yetakchi yo‘q. Jamoaning asosiy to‘purari Robert Levandovski barcha turnirlar doirasida jami 6 gol urgan, 6 o‘yindan beri maydonni golsiz tark etmoqda, jamoaning gollari 15 futbolchi nomiga yozilgan. Sermahsullik borasida polyak forvarddan tashqari (6+4), Joau Feliks (3+4) va Ferran Torres (5+1) yaxshiroq natijaga ega.
Bu vaqtda hujumida muammolar yetarlicha bo‘lgan «Alaves»ning himoya chizig‘ida ham ishlar joyida emas: jamoa 12 turda faqat ikki o‘yinda darvozasi daxlsizligini saqlay olgan.
«SeVILYa» – «BeTIS» (12 noyabr, 22:30)
Bizni yana bir qiziqarli derbi Andalusiyada kutib turibdi. «Sevilya»ning so‘nggi yillardagi pasayishi va aksincha, «Betis»ning ancha barqarorlashuvi natijasida so‘nggi derbilar har qanday ma’noda hududning eng kuchli jamoasini aniqlashga aylanib ham bormoqda. Ya’ni avvalgidek, «Sevilya» yaqqol ustunlikka ega emas. Umuman, «Sevilya» chempionatni bir chetga surib, yevrokuboklarda bor imkoniyatini solishni o‘rganib oldi. O‘tgan mavsumda La Ligada pastki o‘rinlarda qolishiga qaramay, Yevropa Ligasidagi chempionlik evaziga YeChL ishtirokchisiga aylangandi. Bu safar ham ikki frontda kurashish jamoaga yetarlicha noqulayliklar keltirib chiqarmoqda.
Klub hatto o‘tgan mavsum yarmida kelib sovrin yutib bergan Mendilibarni ham iste’foga chiqardi va «Real» bilan o‘yin oldidan Diyego Alonso bosh murabbiy bo‘ldi. O‘sha o‘yin durang bilan yakunlanib, nihoyat «Sevilya» o‘z o‘yinini topgandek tuyulgandi, lekin keyingi natijalarga ham havas qilib bo‘lmaydi. Jamoa yangi murabbiy boshchiligida 6 uchrashuvda faqat bir marta, quyi liga vakili ustidan Ispaniya kubogida g‘alaba qozondi, xolos. Albatta, bu o‘yinlarning bittasi yuqorida tilga olingandek, «Real» bilan, ikkitasi YeChL guruh bosqichida «Arsenal»ga qarshi, qolgan o‘yinlar ham safar uchrashuvlari bo‘lganini inobatga olish kerak. Xullas, urugvaylik murabbiy uchun navbatdagi imkoniyat – u muhim derbida, kuchli raqib ustidan g‘alaba qozonish orqali jamoasida uyg‘onishni amalga oshirishi va mahalliy muxlislar oldida o‘zini ko‘rsatib olishi kerak bo‘ladi.
«Betis», ayniqsa, so‘nggi natijalari e’tibori bilan qarasak, oson raqib emas, hatto favorit ham deya olamiz. Jamoa La Ligada 7, barcha musobaqalarda 11 uchrashuvdan beri mag‘lubiyat nimaligini bilmay kelmoqda. Qatorasiga 5 o‘yinda g‘alaba, ayniqsa, kubok bahsida quyi liga jamoasi darvozasiga 12 gol urilgani alohida e’tiborga molik. Bu «Betis»ning eng yirik hisobdagi g‘alabasi sifatida tarixga kirdi. Ha, raqib yarimprofessional jamoa, lekin Pellegrini shogirdlari keyingi uchrashuvlarda ham sermahsul bo‘layotgani tahsinga sazovor. Ikki kun oldin Yevropa Ligasida «Aris» darvozasiga ham 4 gol yo‘llandi. Xullas, «Betis» yo‘qotilgan ochkolar bo‘yicha hisoblaganda, masalan, «Barselona»dan 4 ochko ortda boryapti, xolos. So‘nggi natijalardan kelib chiqib, bemalol «Betis»ni La Ligada yetakchilari guruhiga qo‘shish, derbida esa, favorit sifatida qayd etish mumkin. Aynan chempionat doirasidagi derbilarda 2018 yildan buyon «Betis»ning qo‘li baland kelmaganini inobatga olsak, mehmonlar uchun yana bir qo‘shimcha motivatsiya.
Tarkiblar borasida mezbonlarda yo‘qotishlar ko‘proq. Darvozabon Nyulan, hamda Markao, Akunya, Serxio Ramos sheriklariga yordam bera olishmaydi. Asosan himoya chizig‘i vakillari. Mehmonlarda yo‘qotishlar deyarli yo‘q. Mark Bartra ancha oldin safdan chiqqan va u yil oxirida mashg‘ulotlarga qaytadi. Yussuf Sabalining holati ham aynan shunday.
Navbatdagi tur arafasida turnir jadvalidagi holat:
«LATsIO» – «ROMA» (12 noyabr, 22:00)
Hali derbi boshlanmasdan murabbiylar dahanaki jangni boshlab yuborishdi. Avvaliga, Sarri yevrokuboklardagi o‘yinlardagi farqqa urg‘u berib, «Latsio» YeChL o‘yinida ishtirok etgani («Feyyenoord»ga qarshi 1:0), «Roma»ning Yevropa Ligasidagi «Slaviya»ga qarshi bahsi o‘rtoqlik uchrashuvi (2:3) maqomida ekanini aytgan bo‘lsa, tabiiyki, javob ko‘p kuttirmadi. Joze Mourinio o‘zi uchun har bir navbatdagi o‘yin juda muhim bo‘lib, mana shu mentalitet yutug‘i ekanini ta’kidladi. Albatta, Sarrini ham bir «tepib» o‘tmasa bo‘lmasdi: «26 marta sovrin yutgan murabbiy bilan hech narsa yutmagan murabbiy o‘rtasidagi farq mana shu mentalitetda».
O‘yin qiziq kechishiga shubha yo‘q. Mourinio har qancha o‘z yutuqlarini eslatmasin, hali ham dor ustida harakatlanmoqda – har bir muvaffaqiyatsiz uchrashuv uni iste’fo yoqasiga olib boraveradi. «Lechche»ga qarshi o‘yinda so‘nggi daqiqalarda ikki gol urib irodali g‘alabaga erishildi, avvalroq Milanda mag‘lubiyat bo‘lgandi. Pragadagi mag‘lubiyat Yevropa Ligasidagi guruhga unchalik ta’sir o‘tkazmaydi, ammo A Seriyadagi har bir ochko ahamiyatlidir. «Roma» kuchli to‘rtlikdan 4 ochko ortda boryapti, so‘nggi 5 o‘yinning 4 tasida g‘alaba qo‘lga kiritildi, lekin toki «Roma» Lukaku, Dibala kabi chempionatning yuqori saviyali futbolchilari bilan «Bolonya»dan ortda borarkan, murabbiydagi bosim hech qachon yo‘qolmaydi. Rim derbisi ushbu qora bulutlarni vaqtincha bo‘lsa ham tarqatish uchun yaxshi imkoniyat.
«Latsio» qo‘shnilardan 1 ochko kam jamg‘argan holda 10-pog‘onani egallab turibdi. Tabiiyki, Sarriga ham g‘alaba suv va havodek zarur. O‘tgan mavsumdagi har ikki derbida ham «Latsio»ning qo‘li baland kelgani Sarri shogirdlariga qo‘shimcha ishonch bersa ajab emas. Oxirgi o‘yinlarda jarohat olgan Adam Marushich va Mattia Dzakkanining o‘rnini to‘ldirish murabbiy uchun eng asosiy vazifa bo‘lsa kerak. Shuningdek, Nikolo Kasale ham katta ehtimol bilan derbida ishtirok eta olmaydi. Mehmonlar safida yo‘qotishlar deyarli yo‘q. O‘tgan mavsum oxirida yoki avvalroq uzoq muddatga safdan chiqqan Smolling, Kumbula, Abrahamdan tashqari. Bu futbolchilarning o‘rni to‘ldirilgan va ularsiz o‘ynashni «Roma» allaqachon o‘rganib olgan.
Navbatdagi tur arafasida turnir jadvalidagi holat:
ShTUTGART – BORUSSIYa D (11 noyabr, 19:30)
Bu jamoalar so‘nggi turlarda peshqadamlardan biroz qolib ketgan bo‘lsa-da, ta’qibda davom etish uchun har ikki tomon nuqtayi nazaridan juda muhim uchrashuv kutib turibdi. Hozirda raqiblar 21 tadan ochko to‘plab, uchinchi va to‘rtinchi o‘rinlarni egallab turishibdi. «Bavariya» va «Bayyer» o‘z o‘rnini bermaydigandek tuyulsa-da, ortda «Leypsig» ham quvib kelayotganini unutmaslik kerak. Ya’ni har qanday yomon natija kuchli to‘rtlikdan ham pastga tushirib yuborishi turgan gap.
«Shtutgart» Bundesligada mavsum kashfiyotlaridan biri bo‘ldi. O‘tgan mavsumda arang ligada qolgan jamoa bu safar juda kuchli boshladi va hatto ba’zan turnir jadvalini boshqardi ham. Ammo bu muvaffaqiyatlarning asosiy qahramoni bo‘lmish Seru Girassining jarohati natijalarga o‘z ta’sirini o‘tkazmay qolmadi. Hujumchi Berlindagi o‘yinda jarohat olib maydonni tark etishidan avval gol urishga muvaffaq bo‘lgandi – «Shtutgart» o‘sha o‘yinni o‘z foydasiga hal qildi. Ammo keyingi ikki uchrashuvda u qadar kuchli bo‘lmagan raqiblarga qarshi mag‘lubiyatga uchraldi. Orada Germaniya kubogi bahsida «Union» ustidan minimal hisobda g‘alaba qozonildi ham, ammo berlinliklar umuman mavsum boshidan beri hammaga yutqazmoqda.
Xullas, katta ehtimol bilan bir necha haftaga safdan chiqqan Girassi ushbu muhim o‘yinda ham qatnasha olmaydi.
O‘z navbatida, «Borussiya» ham so‘nggi uchrashuvlarda ochkolar yo‘qotdi, endi jamoa bor imkoniyatini ishga solishi tabiiy. Dortmundliklar avvaliga Frankfurtda 3:3 o‘ynagan bo‘lishsa, keyin «Bavariya»dan yirik hisobda mag‘lubiyat qabul qilib oldi. Ammo YeChLda «Nyukasl» ustidan qozonilgan ishonchli g‘alaba Terzich shogirdlariga qo‘shimcha ko‘tarinkilik va ishonch taqdim etsa ajab emas. Albatta, tanganing narigi tomoni ham bor – hafta o‘rtasida Chempionlar Ligasida maydonga tushgan jamoa jismoniy tarafdan raqibiga nisbatan kuchsizroq bo‘lib qolishi mumkin.
O‘tgan mavsumda, yuqorida aytilganidek, «Shtutgart» autsayder bo‘lib yurgan davrda ham jamoalarning Shtutgartdagi o‘zaro o‘yini juda shiddatli va murosasiz kechgandi. Avvaliga mezbonlar oxirgi 15 daqiqadagi kambek tufayli 0:2 ni durangga aylantirgan, keyin hakam tomonidan qo‘shib berilgan daqiqalarda mehmonlar oldinga chiqib olgan, ammo so‘nggi soniyalarda baribir mezbonlar mag‘lubiyatdan qutulib qolgan o‘yin 3:3 hisobida yakuniga yetgandi. Albatta, bu safar ham shunday qiziqarli kurashning guvohi bo‘lamiz degan umiddamiz.
Navbatdagi tur arafasida turnir jadvalidagi holat:
