2023 yilning noyabr oyi va umuman kuz fasli O‘zbekistonda meteorologik kuzatuvlar tarixidagi eng issig‘i bo‘ldi. Oktyabrda harorat o‘rtacha iqlimiy me’yordan 1,5-2,5 darajaga, noyabrda esa 3-6 darajaga yuqori bo‘lgan.
Havoning o‘rtacha statistik harorati keskin o‘zgarib turishi noyabr oyi uchun xos, bunday o‘zgarib turishlar joriy yil noyabrda ham kuzatildi, lekin boshqa yillardan farqi, bu o‘zgarib turishlar yuqori harorat fonida sodir bo‘ldi.
Oyning katta qismida havo harorati o‘rtacha ko‘p yillik qiymatlarga nisbatan yuqori bo‘ldi va faqat sovuq davrda iqlimiy me’yorgacha pasaydi. Bu haqda “O‘zgidromet” xabar bermoqda.
Barcha hududlarda harorat o‘rtacha iqlimiy me’yordan 3-6 darajaga yuqori bo‘ldi.
Shu tariqa, 2023 yil noyabr oyi O‘zbekistonda meteorologik kuzatuvlarning barcha yillari uchun eng issiq noyabr oyi reytingida birinchi o‘rinni egalladi.
Eng issiq kunlarda maksimal havo harorati 23-28 daraja iliqqa yetdi. Minimal harorat faqat respublikaning shimolida manfiy (minus) qiymatlargacha pasaydi.
Odatda, respublika hududining katta qismida noyabr oyining birinchi yarmida kunduzgi harorat 15-20 daraja iliq, ikkinchi yarmida esa 10-15 daraja iliq atrofida bo‘ladi. 2023 yil noyabr oyida esa bunday tendensiyalar kuzatilmadi, oyning boshida ham, oxirida ham haroratning yuqori qiymatlari kuzatildi.
2023 yil noyabr oyi respublika bo‘yicha nisbatan quruq bo‘ldi. Respublika hududi bo‘yicha yog‘ingarchilik kam va me’yor atrofida bo‘ldi.
Respublikaning tekislik hududi bo‘yicha yog‘ingarchilik faqat yomg‘ir ko‘rinishida yog‘di. Respublikaning tog‘li hududlaridagina qor yog‘ishi kuzatildi.
Me’yorga nisbatan noyabr oyi 2023 yilning kuz mavsumidagi eng issiq oy (me’yordan 3-6 daraja iliq) bo‘ldi. Oktyabr oyida oyning o‘rtacha harorati me’yordan 1,5-2,5 darajaga yuqori, sentabr esa o‘rtacha ko‘p yillik qiymatlarga yaqin bo‘ldi.
Umumiy olganda, 2023 yil kuzi O‘zbekistonda meteorologik kuzatuvlarning barcha yillari uchun eng issiq bo‘ldi. Ob-havo sharoitiga ko‘ra, o‘zbekistonliklar haqiqatan ham baxmal (barxat) mavsumiga guvoh bo‘ldi.
