Ukraina, Amerika va Britaniya harbiylari Kiyevning qarshi hujumini tayyorlash chog‘ida stol ustidagi xaritalar ustiga figuralar qo‘yib, kompyuterdagi «harbiy o‘yinlar»dan foydalanishgan, deb yozadi Washington Post nashri.
«Biroq, Vashington qisqa muddat ichida Ukraina qurolli kuchlari g‘arb namunasidagi jangovar kuchga aylanishi, ayniqsa, Kiyevning harbiy havo kuchlarisiz zamonaviy qurolli kuchlarning ajralmas qismiga aylantirish borasida qattiq adashgan», deb yozadi nashr.
Amerikaliklar va ukrainlarning fikri vaqti-vaqti bilan strategiya va taktika borasida keskin farqlangan. Pentagon qarshi hujum o‘z pozitsiyalarini mustahkamlashda davom etayotgan RF qurolli kuchlariga xalaqit berish uchun aprel oyi o‘rtalarida boshlanishini istagan. Ukrainaliklar esa qo‘shimcha qurol-yarog‘lar va tayyorgarliksiz bunga tayyor emasliklarini aytib, ikkilanishgan.
O‘sha vaqtda Ukrainada mavjud imkoniyatlar bilan Rossiya pozitsiyalariga mexanizatsiyalashgan yuzma-yuz hujumni amalga oshirish imkonli ekaniga AQSh harbiylarining ishonchi komil bo‘lgan.
Modellashtirish shuni ko‘rsatganki, Ukraina qurolli kuchlari Azov dengiziga chiqish va janubda rus qo‘shinlarini qirqib qo‘yishni 60-90 kun ichida eplashi mumkin bo‘lgan. AQSh razvedkasi muvaffaqiyatga 50 foiz imkoniyat bergan, deb qayd etadi Washington Post.
AQSh janubiy yo‘nalish bo‘ylab maqsadli qarshi hujumni yoqlagan, Ukraina rahbariyati esa uchta yo‘nalish: Melitopol, Berdyansk va Baxmut bo‘ylab hujum qilishni istagan. Ukraina qat’iy qarshi hujumda ko‘plab yo‘qotishlarga duchor bo‘lishidan cho‘chigan, AQSh esa vaqt o‘tishi bilan baribir yo‘qotishlar bundan-da ko‘proq bo‘ladi, deb hisoblagan.
15 iyunda, qarshi hujum boshlanganidan 2 hafta o‘tib AQSh mudofaa vaziri Lloyd Ostin ukrainalik hamkasbi Reznikovdan nega Ukraina QK tutun pardasi ortida harakat qilishi mumkin bo‘lgan, yanada qamrovli mexanizatsiyalashgan g‘arb texnikasidan minalardan tozalashda foydalanmayapti, deb so‘ragan.
Ukraina mudofaa vazirligining sobiq rahbari bu qarorni Ukraina harbiy qo‘mondonlari qabul qilganini aytib, Ukrainaning zirhli texnikalarini Rossiya vertolyotlari, pilotsiz parvoz qurilmalari va artilleriyasi oldinga siljishga har bir urinishda yo‘q qilayotgani, havodan qo‘llov bo‘lmagan holatda yagona variant yayov hujumga o‘tish bo‘lib qolayotganini aytgan.
