Baxmut atrofida Rossiya hujumini qaytarayotgan ukrain tankchilari va artilleriyachilari. Urush suratlari

Ukrainada urushning 654-kuni o‘tdi. Asosiy ma’lumotlar:

• Finlandiya oliy sudi «Rusich» diversiya-shturm razvedka guruhi yetakchilaridan biri, Ukraina hududida harbiy jinoyatlar sodir etishda ayblangan Yan Petrovskiyni Ukrainaga ekstraditsiya qilishga rozi bo‘lmadi. O‘z navbatida, Finlandiya politsiyasi «Rusich»ning yana bir yetakchisi Voislav Tordenga qarshi dastlabki tekshiruv boshladi.
• Kiyevda qizil armiya generali Nikolay Shchorsning haykali demontaj qilindi.
• Oq uydagilar Ukrainani qo‘llab-quvvatlov to‘xtatilishi tufayli «amerikaliklar qoni bilan to‘lov qilishga to‘g‘ri kelishi mumkinligi»ni aytdi.
• Oliy Rada komendantlik soatini buzganlik uchun jarima qo‘llash to‘g‘risidagi qonun loyihasini qo‘llab-quvvatladi.
• The Wall Street Journal Ukraina 2025 yilda yirik qarshi hujum o‘tkazishi dargumon ekanini ma’lum qildi.
• Kerchda gaz quvuri yonib ketdi. Bir necha o‘n ming kishi gazsiz qolgan.
• Bayden ma’muriyati respublikachilar Ukrainaga yordamni bloklashini to‘xtatishi uchun immigratsiya siyosatini qat’iylashtirish imkoniyatini ko‘rib chiqmoqda.

Baxmut frontidagi ukrain tankchilari

2023 yil mayidan buyon Baxmutni ozod etishga harakat qilib kelgan Ukraina qurolli kuchlarining bir necha brigadasi qishda mudofaaga o‘tdi. Rossiya qo‘shini ukrain guruhining zaiflashganidan foydalanmoqda (bu yerdan bir qancha bo‘linmalar Avdiyivka mudofaasi uchun olib o‘tilgan) va shahar shimolidan va janubidan qarshi hujumga o‘tgan. Ukraina QKning Baxmut atrofida qolgan bo‘linmalari shahardan shimoldagi Bogdanovka va janubdagi Kleshchiyevka hamda Andriyivka uchun og‘ir janglar olib bormoqda.

Baxmut atrofidagi ukrain artilleriyachilari

Ukraina QKning Donetsk oblastidagi front hospitali

Kiyevda Shchorsning haykali buzilishi

Xarkiv va Pavlograd o‘qqa tutilishi oqibatlari

8 dekabrga o‘tar kechasi Rossiya qo‘shini Xarkiv bo‘ylab oltita raketa bilan zarba yo‘lladi. Region ma’muriyati rahbari Oleg Sinegubovning so‘zlariga ko‘ra, hujum S-300 kompleksi orqali yo‘llangan. Zarbalar oqibatida ikki kishi yaralangan: 36 yoshli ayolga voqea joyida yordam ko‘rsatlgan, 25 yoshli erkakni shifoxonaga joylashtirishga to‘g‘ri kelgan. Turar joy, o‘quv muassasasi binosi, bolalar maydonchasi va 20 ga yaqin avtomobil shikastlangan, deya yozgan Sinegubov va gap faqat «fuqarolik obektlari» haqida ketayotganini qo‘shimcha qilgan.

Shuningdek, Dnipropetrovsk oblasti ham yoppasiga o‘qqa tutilgan, bu haqda mahalliy ma’muriyat rahbari Sergey Lisak xabar bergan. «Pavlograd, Ternivka va Yurevskda vayrongarchiliklar bor. Sanoat korxonasi shikastlangan. 16 ta xususiy uy va 5 ta hovli shikastlangan. Cherkovga zarba berilgan. Avtolarni urishgan», — deya yozgan Lisak telegram-kanalida. Raketa zarbasi oqibatida Pavlogradda sakkiz kishi jarohatlangan — 32 yoshdan 66 yoshgacha bo‘lgan erkaklar. Jabrlanuvchilarning olti nafari shifoxonaga yotqizilgan, ulardan ikki nafari — og‘ir ahvolda. 

Avdiyivka, Donetsk oblasti

Avdiyivka shahri Rossiya tomonidan anneksiya qilingan Donetsk shahridan 15 kilometr masofada joylashgan. 2014 yilda Avdiyivka bir necha oy muddatga ayirmachilar qo‘liga o‘tadi, ammo Ukraina qurolli kuchlari o‘sha yilning o‘zidayoq shaharni qaytarib oladi. Shundan buyon shahar uchun janglar davom etmoqda, u doimo zarbalar ostida qoladi. Rossiyaning keng ko‘lamli bosqini boshlanganidan keyin Avdiyivka urushdagi qaynoq nuqtalardan biriga aylandi. Oktyabr oyi o‘rtalarida Rossiya armiyasi shahar uchun janglarni qaytadan faollashtirdi. Bu 2014 yildan buyon eng yirik ko‘lamdagi hujum bo‘lmoqda.