Rossiyada qiyin ahvolga tushib qolgan fuqarolar O‘zbekistonga qaytarildi

«Dunyo» ma’lum qilishicha, O‘zbekiston bosh konsulligi diplomatlari tomonidan Amur viloyatida tashkil etilgan konsullik sayyor qabuli davomida ushbu viloyatning Blagoveshchensk shahrida vaqtincha bo‘lib turgan 1984 yilda tug‘ilgan S.T. ikki nafar voyaga yetmagan farzandi bilan birga moliyaviy qiyin ahvolga tushib qolganligi sababli O‘zbekistonga qaytish uchun amaliy yordam so‘rab murojaat qilgan.

O‘rganishlar natijasida, u 2018 yil oktyabr oyidan beri Rossiyaning Amur viloyatida vaqtincha ishlayotgani ma’lum bo‘ldi. S.T.ning turmush o‘rtog‘i joriy yil oktyabr oyida Rossiya migratsiya qonunchiligini buzganligi sababli o‘rnatilgan tartibda O‘zbekistonga deportatsiya qilingan.

Ushbu vajlar inobatga olinib, mamlakat bosh konsulligi tomonidan fuqaroga ko‘mak ko‘rsatishga qaror qilindi. «Mehr» loyihasi fondi mablag‘lari hisobidan S.T. va uning ikki nafar farzandiga O‘zbekistonga qaytishi uchun 3 ta aviachipta sotib olib berildi.