Rossiyaning Belgorod oblasti Yablonovo qishlog‘i yaqinida Il-76 rusumli harbiy-transport samolyoti halokatga uchradi. Bu haqda dastlab «112» telegram-kanali xabar tarqatdi. Kanal bortda 63 kishi bo‘lgani va hech kim omon qolmaganini ma’lum qildi. 63 kishi halok bo‘lgani haqida rossiyalik harbiy muxbir Yuriy Kotenok ham xabar qilgan, u bu ma’lumotni qayerdan olganiga aniqlik kiritmagan.
Belgorod oblasti gubernatori Vyacheslav Gladkov aynan nima bo‘lganini ochiqlamagan holda Korochansk rayonida ro‘y bergan «hodisa» haqida yozdi. «Hozirda voqea joyida tergov guruhi va FVV xodimlari ish olib bormoqda. O‘z ish grafigimni o‘zgartirdim va hududga yo‘l oldim. Barcha tafsilotlar keyinroq», — degan uning xabarida.
Ko‘p o‘tmay Rossiya mudofaa vazirligi Il-76 halokatini tasdiqladi. Vazirlikka ko‘ra, bortda almashuv uchun Belgorod oblastiga olib kelingan ukrainalik 65 nafar harbiy asir, samolyot ekipajining olti a’zosi hamda uch nafar kuzatib boruvchi bo‘lgan. Harbiy idora samolyot rejali parvozni amalga oshirish chog‘ida halokatga uchraganini ma’lum qilgan. Havo-kosmik kuchlari komissiyasi «halokat sabablarini o‘rganish» uchun voqea joyiga yo‘l olgan.
Keyinroq Gladkov bortda bo‘lganlarning hech biri omon qolmaganini tasdiqladi.
«Bletgorod» telegram-kanalida Belgorod atrofida samolyot halokatga uchragani aks etgan video joylashtirilgan.
«Ukrainskaya pravda»ning Ukraina qurolli kuchlaridagi manbasi samolyot halokati — Ukraina qurolli kuchlarining «ishi» ekani haqida xabar berdi. Nashrning Bosh shtabdagi suhbatdoshi ushbu samolyot raketalar olib ketayotgan bo‘lganini aytgan. Ma’lum vaqt o‘tib «Ukrainskaya pravda» o‘z xabarini tahrirlab qo‘ydi. Endi u yerda faqat Ukraina qurolli kuchlaridagi manba samolyot qulagani faktini tasdiqlagani haqidagi ma’lumot qolgan. Nashr suhbatdoshi samolyot Xarkiv oblastini o‘qqa tutishda qo‘llanadigan S-300 komplekslari uchun raketalarni tashiganini aytgan. Il-76 halokati — «Ukraina qurolli kuchlarining ishi» ekani haqidagi ma’lumot materialdan olib qo‘yilgan.
Ukraina mudofaa vazirligidagi manba «Suspilne» nashriga Il-76 Ukraina QK tomonidan o‘qqa tutilgani haqidagi ma’lumotni hozircha tasdiqlay olmasligi, «ma’lumot hali o‘rganilayotgani»ni bildirgan.
