Respublikaning turli hududlaridagi MFY binolarida har kuni soat 7:30 da mahalla raisi va xodimlar tomonidan davlat madhiyasi aytilmoqda. Bu haqda Kun.uz’ning bir nechta manbalari ma’lum qilgan.
Aytishlaricha, bu talab bo‘yicha biror bir yozma ko‘rsatma yo‘q, topshiriq “yuqoridan” og‘zaki berilgan. Topshiriq bilan birga uning ijrosi yuzasidan davlat madhiyasi ijro etilgani aks etgan videolavhani har kuni tuzilmaning yuqori bo‘g‘inlariga hisobot sifatida topshirish (Telegram messenjeri orqali) talabi ham qo‘yilgan.
“Mas’ullarning bu topshirig‘ini shunchaki ko‘zbo‘yamachilik, to‘g‘rirog‘i “galochka” uchun qilingan ish deyish mumkin. Sababi, respublikada o‘ng mingga yaqin mahalla bor. Har kuni shuncha mahallada madhiya aytildimi yoki yo‘qligini tekshirib o‘tirish, ular tashlagan videolavhalarni tinglab ko‘rish deyarli imkonsiz. Qolaversa, ayrim mahallalarimiz hududida ancha katta, MFY binosi va raisning uyi orasidagi masofa bir necha kilometrni tashkil qiladi. Bu yoshi katta mahalla raislariga noqulaylik tug‘diryapti, kamiga mehnat qonunchiligi buzilishiga ham sabab bo‘lyapti” deydi Kun.uz muxbiri bilan gaplashgan, ismini oshkor qilishni istamagan mahalla raisi.
Topshiriqdan so‘ng respublikaning barcha hududlarida uning ijrosi talab qilina boshlangan. Masalan, Namangan viloyatining Uchqo‘rg‘on tumanidagi MFYlarda ish boshlanishidan oldin davlat madhiyasi aytilyapti. Bu haqda tuman hokimligi xabar bergan. Unda ta’kidlanishicha, tumanidagi barcha 64 ta MFYda mahalla beshligi kunlik faoliyatini davlat madhiyasini ijro etish bilan boshlamoqda.
Madhiya ijrosi bilan bog‘liq bu topshiriq “O‘zbekiston respublikasi davlat madhiyasi to‘g‘risida”gi qonunga zid bo‘lishi mumkin.
Qonunning 3-moddasiga ko‘ra, davlat madhiyasi quyidagi holatlarda ijro etiladi:
