U birinchi urinishdayoq ushbu natijani qo‘lga kiritgan.
Xatirchi tumanidagi 22-umumta’lim maktabining 4-sinf o‘quvchisi Zarina Muxiddinova chet tilini bilish darajasi bo‘yicha B2 qo‘lga kiritdi. Bu Navoiy viloyatida eng yaxshi natijalardan biri bo‘lgan.
Kun.uz muxbirining aniqlik kiritishicha, Zarinaning onasi Mohichexra Rustamova oliy toifali ona tili va adabiyot fani o‘qituvchisi. Otasi Husniddin Baratov esa tarix fanidan repititorlik qiladi.
Zarina chet tilini o‘rganish bilan bir qatorda shaxmat bilan ham shug‘ullanadi. U shaxmat bo‘yicha o‘tkazilgan turli musobaqalarda viloyat hamda respublika darajasida turli sovrinlarni qo‘lga kiritgan.
“Maktabimizda chet tilini bilish darajasi bo‘yicha sertifikat olgan yuqori sinf o‘quvchilari ko‘p. Ammo boshlang‘ich sinf o‘quvchilari orasida yo‘q edi. Zarina yosh toifasi bo‘yicha B2 sertifikatini qo‘lga kiritishda nafaqat maktab yoki tumanimizda, viloyatimizda ham yaxshi natija qayd etdi”, deydi u tahsil olayotgan maktab o‘qituvchisi Dilshoda Mustafoyeva.
Zarina Muxiddinova B2 sertifikatini ilk urinishdayoq olgan.
Eslatib o‘tamiz, OTMga o‘qishga kirishda chet tilidan B2 sertifikati bor abituriyentga maksimal ball beriladi.
