Pichoqlangan erkak va bo‘g‘ib o‘ldirilgan ayol. Huquqni muhofaza qilish akademiyasida nimalarni uchratish mumkin? 

2024 yil 15 fevral kuni tergov va prokuratura sohasida kadrlarni tayyorlash, qayta tayyorlash va ularning malakasini oshirish tizimi bilan o‘quvchilarni yaqindan tanishtirish maqsadida Huquqni muhofaza qilish akademiyasida ochiq eshiklar kuni tashkil qilindi.

Ekskursiya doirasida akademiyada Toshkent shahri maktablari va yuridik texnikum bitiruvchilari, IIV huzuridagi Toshkent shahri va viloyati akademik litseylari o‘quvchilari, akademiya talabalarining ota-onalari, shuningdek OAV vakillari to‘plandi. Mehmonlarga o‘quv dasturlari, faoliyat yo‘nalishlari, talabalar uchun yaratilgan sharoitlar haqida ma’lumotlar taqdim etildi.

Shuningdek, akademiyaning maxsus poligonida tergov-kriminalistika taktikalari va metodikalarini amaliy qo‘llash imitatsiyasi, voqea joyini ko‘zdan kechirish va jinoyatni ochishga oid qiziqarli kvest musobaqalari o‘tkazildi. Mehmonlar sud imitatsiyasi xonasi, ekspertiza laboratoriyasi bilan ham tanishishdi.

O‘zbekiston Respublikasi Huquqni muhofaza qilish akademiyasi Prezidentning 2022 yil 28 noyabrdagi “Jinoyatlarni tergov qilish sohasida malakali kadrlarni tayyorlashning sifat jihatidan yangi tizimini joriy etish to‘g‘risida”gi Farmoniga asosan Bosh prokuratura Akademiyasi negizida tashkil etilgan. Ushbu o‘quv dargohi ixtisoslashtirilgan oliy ta’lim hamda ilmiy-tadqiqot muassasasi hisoblanadi.

Muassasada huquqni muhofaza qilish sohasida ikki bosqichli tizim, ya’ni bakalavriat hamda magistratura bosqichlarida kadrlar tayyorlanadi, shuningdek, prokuratura organlari xodimlari, vakolatli davlat organlarining surishtiruv va tergov tuzilmalari xodimlarining malakasi oshiriladi hamda qayta tayyorlanadi. Ta’lim dargohi 3 ta fakultet, 5 ta markaz, 15 ta bo‘lim, 13 ta kafedradan iborat. 

Akademiyada respublika miqyosida birinchi bo‘lib tashkil qilingan Dark web kiberlaboratoriyasi, shuningdek, mobil kriminalistik avtolaboratoriyadan foydalanish va tergov jarayonlarida poligraf (detektor) texnologiyalarini qo‘llash imkoniyati ham mavjud.

Diyoraxon Nabijonova tayyorladi.
Operator hamda montaj ustasi: Abduqodir To‘lqinov