Mubashshir Ahmad Turkiyada ozodlikka chiqdi

Azon Global axborot tahliliy portali asoschisi, Mubashshir Ahmad taxallusi bilan tanilgan Alisher Tursunov 2023 yilning 28 dekabridan buyon Turkiyada hibsda qolayotgani ma’lum bo‘ldi. Bugun u ozod qilingan.

«2023 yilning 28 dekabri kuni O‘zbekiston Respublikasi fuqarosi Tursunov Alisher Ahmadovich (“Mubashshir Ahmad”) Turkiya politsiyasi tomonidan o‘zi yashab turgan uyidan olib ketilganligi va Istanbul viloyati Chatalja tumanida joylashgan Binkilich deportatsiya markaziga joylashtirilganligi xabar qilingan edi.

Bugun, 21 fevrali kuni vatandoshimiz deportatsiya markazidan oilasi bag‘riga qaytganini ma’lum qilamiz», — deb xabar berdi O‘zbekistonning Turkiyadagi elchixonasi.

Kun.uz'ning O‘zbekiston rasmiy idoralaridagi manbasiga ko‘ra, Mubashshir Ahmad jamoat xavfsizligiga tahdid gumoni bilan olib ketilgan. Turkiyadagi o‘zbek diplomatlari u saqlanayotgan joyga borib, o‘zi bilan suhbatlashgan, uni saqlab turish sharoitini o‘rganishgani xabar qilingan edi.

O‘zbekistonning Istanbuldagi bosh konsulxonasi ma’lumotiga ko‘ra, Mubashshir Ahmadga nisbatan tegishli konsullik-huquqiy yordam ko‘rsatib kelingan.

Ma’lumot uchun, Mubashshir Ahmad 2023 yil avgustda O‘zbekistonda o‘zi asos solgan Azon.uz sayti o‘z faoliyatini to‘xtatganini ma’lum qilgan edi. Shundan so‘ng u noyabr oyida o‘zbek, rus, ingliz va turk tillarida faoliyat yurituvchi Azon Global portali faoliyatini yo‘lga qo‘ygan.