Мубашшир Аҳмад Туркияда қўлга олинди

“Azon Global” ахборот таҳлилий портали асосчиси Алишер Турсунов (Мубашшир Аҳмад тахаллуси билан танилган) 2023 йил 28 декабр куни Туркия ички ишлар тизими ходимлари томонидан гумонланувчи сифатида олиб кетилган. Бу ҳақда Azon Global порталида маълум қилинди.

“Дастлаб қандайдир англашилмовчилик бўлгани, шу боис оммани беҳуда ташвишга солиш керак эмаслиги каби мулоҳазалар билан бу ҳақда кенг оммага хабар берилмади. Ундан кейин, устоз Мубашшир Аҳмадга қўйилаётган айбловлар умуман асоссиз экани, бу ҳол дастлабки суриштирувдаёқ аниқланишига ва устозни қўйиб юборилишига қатъий ишонч бор эди. Аммо, афсуски, вазият ундай бўлиб чиқмади.

Туркия қонунлари бўйича гумонланувчини 3 кундан ортиқ тутиб туриш мумкин эмас. Шу муддат ичида қўйилаётган айб исботланса, Адлия идораларига ўтказилиши, исботланмаса, чиқариб юборилиши лозим. Баъзан чет эллик шахсларни қайтариб юбориш (депортация) марказларига ўтказишади ва у ердан ўз ватанига жўнатишади ёки озод қилишади.

Дастлабки суриштирувларда, табиийки, устоз Мубашшир Аҳмадга қўйилаётган айблов ўз исботини топмади. Қайтариб юбориш (депортация) марказларига ўтказилган домлани орадан шунча кун ўтиб ҳам тутиб туришгани тушунарсиз бўлиб қолмоқда. Албатта, бу ҳодиса содир бўлган куниданоқ адвокатлар ҳаракатларини бошлашган ва бошқа барча керакли чора тадбирлар кўрилмоқда”, – дейилади хабарда.

Kun.uz'нинг Ўзбекистон расмий идораларидаги манбасига кўра, Мубашшир Аҳмад жамоат хавфсизлигига таҳдид гумони билан олиб кетилган. Туркиядаги ўзбек дипломатлари у сақланаётган жойга бориб, ўзи билан суҳбатлашгани, уни сақлаб туриш шароитини ўрганишгани айтилмоқда.

Ўзбекистоннинг Истанбулдаги бош консулхонаси 9 январ куни берган маълумотга кўра, Мубашшир Аҳмадга нисбатан тегишли консуллик-ҳуқуқий ёрдам кўрсатилмоқда.

“Ҳақиқатдан ҳам 2023 йилнинг 28 декабр куни Ўзбекистон Республикаси фуқароси, 1974 йилда туғилган Турсунов Алишер Аҳмадович (тахаллуси Мубашшир Аҳмад) Туркия полицияси томонидан ўзи яшаб турган уйидан олиб кетилган ва Истанбул вилояти Чаталжа туманида жойлашган Бинкилич депортация марказига жойлаштирилган”, дейилади консулхона ахборотида.

Маълумот учун, Мубашшир Аҳмад 2023 йил августда Ўзбекистонда ўзи асос солган Azon.uz сайти ўз фаолиятини тўхтатганини маълум қилган эди. Шундан сўнг у ноябр ойида ўзбек, рус, инглиз ва турк тилларида фаолият юритувчи Azon Global портали фаолиятини йўлга қўйган.

Эслатиб ўтамиз, 2020 йил декабр ойида Туркияда ўзбекистонлик журналист Абдукарим Мирзаев ҳибсга олиниб, уни депортация қилиш ҳақида қарор чиқарилган, у 33 кун ҳибсда сақлангач, қўйилган гумонлар тасдиғини топмагани сабаб озодликка чиқарилган, сўнг бир неча ой ўтиб гумонлар расман олиб ташланган эди.