Yangi O‘zbekiston ko‘chasi chorrahasida «garmoshka» avtobus va Tracker to‘qnashdi. Avtobus salonida yo‘lovchilar bo‘lmagan, Tracker haydovchisi tan jarohati olib, shifoxonaga olib ketilgan.
Poytaxtda King Long rusumli avtobus va Tracker rusumli yengil avtomobil ishtirokida yo‘l-transport hodisasi sodir bo‘ldi.
«Toshshahartransxizmat» xabariga ko‘ra, bugun, 29 fevral kuni soat 06:45 larda, «2-Avtobus saroyi» filiali tasarrufidagi King Long rusumli 63-sonli yo‘nalishda harakatlanayotgan haydovchi A.J. boshqaruvidagi avtobus AShB tomon harakatlanayotgan vaqtda YTH sodir bo‘lgan.
Ma’lum qilinishicha, avtobus Mirzo Ulug‘bek tumani, Yangi O‘zbekiston ko‘chasi chorrahasidan qayrilib olish vaqtida qarama-qarshi yo‘nalishda harakatlangan Tracker rusumli yengil avtomobil yuqori tezlikda (197 km/soat) kelib, avtobus bilan (o‘rta shina qismiga tegib) to‘qnashuv sodir etgan.
Ushbu yo‘l-transport hodisasi vaqtida avtobus salonida yo‘lovchilar bo‘lmagan. Tracker avtomobili haydovchisi tan jarohati olgan va tez tibbiy yordam ko‘rsatish uchun shifoxonaga olib ketilgan.
Hozirda ushbu yo‘l-transport hodisasi Toshkent shahar IIBB YHXB xodimlari tomonidan rasmiylashtirilib, tergov-surishtiruv ishlari olib borilyapti.
