Narxlarni oshirish bo‘yicha yakuniy qaror qabul qilinmagan - UzAuto Motors

Kompaniya izohiga ko‘ra, bugun berilgan bayonotdan asosiy maqsad – dilerlar bilan hamkorlikning yangi tizimiga o‘tilganini e’lon qilish bo‘lgan. “Chevrolet.uz saytida ko‘rsatilgan narxlar 2024 yilning 4-choragi uchun prognoz ko‘rsatkichlari asosida hisoblab chiqilgan. Narxlarni oshirish bo‘yicha yakuniy qaror qabul qilinmagan”, – deya ma’lum qildi UzAuto Motors.

Foto: Kun.uz

UzAuto Motors kompaniyasi biroz avval e’lon qilgan bayonotiga qo‘shimcha izoh bilan chiqdi.

“Kompaniya xabaridagi asosiy maqsad mijozlarga xizmat ko‘rsatish sifatini oshirishni nazarda tutuvchi dilerlar bilan o‘zaro hamkorlikning yangi tizimiga o‘tganini e’lon qilish edi.

Hozirda kontraktatsiya jarayonlari olib borilmayotganini inobatga olgan holda, Chevrolet.uz saytida ko‘rsatilgan narxlar 2024 yilning 4-choragi uchun prognoz ko‘rsatkichlari asosida hisoblab chiqilgan.

Narxlarni oshirish bo‘yicha yakuniy qaror qabul qilinmagan”, – deyiladi kompaniya axborotida.

Bundan avvalgi rasmiy xabarda 2024 yilning ikkinchi yarmida ishlab chiqariladigan avtomobillar uchun qo‘shimcha kontraktatsiya ochilishi hamda Damas, Labo va Chevrolet Cobalt avtomobillarining narxi 3,5 – 6,7 foizgacha bo‘lgan oraliqda qayta ko‘rib chiqilishi aytilgandi.

Shuningdek, kompaniya o‘z dilerlariga keyinchalik sotish uchun avtomobillarni xarid qilish imkoniyatini berishini e’lon qildi. Bunda, dilerlarga avtomobil uchun tavsiya etilgan chakana qiymat belgilanadi.

“Ushbu yondashuv nafaqat dilerlik markazlari o‘rtasidagi raqobatni kuchaytiradi, balki xizmat ko‘rsatish sifatini yaxshilaydi. Dilerlik markazlari xizmat ko‘rsatish sifati va innovatsion xizmatlarni yaxshilash orqali qo‘shimcha opsiyalar va aksessuarlarni taklif qilish imkoniyatiga ega bo‘lishadi”, – deya ma’lum qildi UzAuto Motors.