Президент Шавкат Мирзиёев 15 апрел куни Марказий Осиё мамлакатлари ва Кўрфаз араб давлатлари ташқи ишлар вазирлари йиғилиши доирасида мамлакатимизда бўлиб турган Кўрфаз араб давлатлари ҳамкорлик кенгаши бош котиби Жасим бин Муҳаммад ал-Будайвийни қабул қилди.
Ўзбекистон билан Кенгаш ўртасидаги конструктив мулоқотни янада ривожлантириш ва ҳамкорликни мустаҳкамлаш масалалари кўриб чиқилди. Давлат раҳбари минтақалар ўртасидаги кўп қиррали ҳамкорликнинг бугунги суръатидан мамнунлигини билдирди ҳамда Тошкент шаҳрида ўтган ташқи ишлар вазирлари иккинчи учрашувининг самарали якунларини юқори баҳолади.
2023 йили Жидда шаҳрида ўтган Марказий Осиё мамлакатлари ва Кўрфаз араб давлатлари биринчи саммитида эришилган келишувлар ижросининг бориши муҳокама қилинди.
Ўзбекистон томонидан инвестиция, савдо, юқори технологиялар, туризм ва бошқа йўналишларда илгари сурилган ташаббус ва таклифларни амалга оширишга алоҳида эътибор қаратилди.
2025 йилда Самарқанд шаҳрида ўтадиган иккинчи саммит кун тартибини тайёрлаш билан боғлиқ масалалар кўриб чиқилди.
Шунингдек, Шавкат Мирзиёев Озарбойжон Республикаси ташқи ишлар вазири Жайхун Байрамов, Бирлашган Араб Амирликлари энергетика ва инфратузилма вазири Суҳайл ал-Мазруий, Баҳрайн ташқи ишлар вазири Абдуллатиф бин Рашид ал-Заяний, Кувайт Давлати ташқи ишлар вазири Абдулла ал-Яҳё, Ўмон султонлиги ташқи ишлар вазири Бадр бин Ҳамад ал-Бусайдий, Саудия Арабистони ташқи ишлар вазири шаҳзода Файсал бин Фархон Ол Сауд билан ҳам учрашди.
