Yangi qurilayotgan xonadonlar uchun to‘langan pullarni o‘zlashtirganlikda gumonlangan ikki shaxs qidiruvga berildi

Toshkentda fuqarolarning yangi xonadonlar uchun to‘langan pullarini o‘zlashtirganlikda gumonlanayotgan ikki shaxs qidiruvga berilgan. Uylar ruxsatnomalarsiz qurilgani aytilmoqda. Kompaniya rahbari qamoqqa olingan.

Foto: Toshkent shahar IIBB

Toshkent shahar IIBBga bir nechta fuqarolar ariza bilan murojaat qilib, yangi qurilayotgan ko‘p qavatli uylardagi xonadonlar uchun to‘lovni amalga oshirgani, biroq MChJ tomonidan shu kunga qadar xonadonlar topshirilmagani sababli ularga nisbatan qonuniy chora ko‘rishni so‘ragan.

O‘tkazilgan tekshiruv jarayonida aniqlanishicha, 1977 yilda tug‘ilgan O.Sh. Max-House-Group MChJni tashkil qilib, o‘zining sheriklari - 1982 yilda tug‘ilgan A.O. va 1989 yilda tug‘ilgan A.S. bilan birga bir nechta fuqarolarga nisbatan firibgarlik sodir etgan.

Jumladan, O.Sh. MChJ nomidan Uchtepa va Chilonzor tumanlarida qurilayotgan ko‘p qavatli uylardagi xonadonlarni sotishini ma’lum qilib, fuqarolardan xonadonlar uchun to‘lovlarni qabul qilib olgan. Ammo ushbu ko‘p qavatli uylar qurilishi uchun hech bir mutasaddi tashkilotlardan ruxsat olinmagan va uy qurishga kerakli biron-bir hujjatlarga ega bo‘lmagan. Ular kadastr hujjatlari yo‘q bo‘lgan xonadonlarni fuqarolarga sotishini bildirib, aldov yo‘li bilan juda ko‘p miqdordagi pullarni o‘zlashtirib olgan.

Mazkur holat yuzasidan Toshkent shahar IIBB huzuridagi Tergov boshqarmasi tomonidan Jinoyat kodeksining 168-moddasi 4-qismi ("Firibgarlik") bilan jinoyat ishi qo‘zg‘atilgan. Tergov jarayonida O.Sh.ga nisbatan qamoqqa olish tarzidagi ehtiyot chorasi qo‘llangan. Gumonlanuvchilar A.S. va A.O. tergovdan qochib yashiringani sababli, ular qidiruvga berilgan. Hozirda tergov harakatlari davom etmoqda.

#qidiruv #xonadon