Ukrainada urushning 811-kuni o‘tdi. Asosiy ma’lumotlar:
- Rossiya mudofaa vazirligi Belgorod uzra 25 ta reaktiv snaryad urib tushirilganini ma’lum qildi. Tinch aholi vakillaridan biri jarohatlangan.
- Rossiya qo‘shini Xarkivga aviabomba tashladi. Ko‘p qavatli uy zarbaga uchrashi oqibatida 20 dan ortiq kishi yaralangan.
- Volgograd oblastida «tashqi aralashuv» tufayli yuk poyezdi izdan chiqqan. Baza ma’lumotiga ko‘ra, unga dron hujum qilgan.
- RF mudofaa vazirligining Kadrlar bosh boshqarmasi boshlig‘i, general-leytenant Yuriy Kuznetsov o‘ta yirik miqdorda pora olishda gumonlanib hibsga olindi.
- Bayden Rossiya urani importini taqiqlash to‘g‘risidagi qonunni imzoladi.
- Belgoroddagi turar joy pod’yezdi qulashi oqibatida halok bo‘lganlar soni 17 nafarga yetdi.
Xarkiv o‘qqa tutilishi oqibatlari
RF qo‘shini 2023 yil oxirida Xarkivni o‘qqa tutishni kuchaytirgandi. Qayrib yarim yildan buyon shahar muntazam zarbalar ostida yashamoqda. «Sen doimo o‘ylaysan — qayerga? Va darhol uchish trayektoriyasini hisoblay boshlaysan… Raketa qayerga va nima uchun uchib kelishini bilmaysan», — degandi 2024 yil qishida Xarkivda yashovchilardan biri BBC rus xizmati bilan suhbatda. Aprel oyi boshiga kelib shaharda deyarli butun energetika infratuzilmasi vayron bo‘ldi, deb xabar qilgan Xarkiv meri Igor Terexov. May oyi boshida esa Rossiya qo‘shini Xarkiv oblastida yangi yurish boshladi.
RF qo‘shini Xarkiv bo‘ylab zarba berishda davom etmoqda. 14 may kuni kun davomida ular olti bor zarba yo‘llashdi, jumladan shaharga dronlar bilan hujum qilib, UMBP D-30 rusumli yangi bombalar qo‘llashdi, deb xabar bergan oblast ma’muriyati rahbari Oleg Sinegubov. Shahardagi uchta rayonda xususiy va ko‘p qavatli uylar, o‘quv binolari, avtomobillar shikastlangan. 22 kishi jarohat olgan.
Vlada Liberova / Libkos / Getty Images
