Surxondaryoda sodir bo‘lgan YTHda “Nexia” yonib ketdi

Surxondaryo viloyati Jarqo‘rg‘on tumanida sodir bo‘lgan YTHda “Nexia” mashinasi yonib ketgan. Viloyat IIB YHXB axborot xizmatining xabar berishicha, hodisa 7 iyun kuni sodir bo‘lgan.

29 yoshli haydovchi “Nexia” mashinasi bilan qayrilib olayotib o‘zi bilan bir yo‘nalishda kelayotgan 23 yoshli haydovchi boshqaruvidagi “Nexia-2”ning yo‘liga chiqib ketib, u bilan to‘qnashgan.

Oqibatda “Nexia-2” mashinasida yong‘in yuzaga kelgan. Olib borilgan tezkor choralar natijasida yong‘in bartaraf etilgan va hodisa rasmiylashtirilgan.

Qayd etilishicha, hodisada har ikki mashinada bo‘lganlardan hech kim jarohatlanmagan va halok bo‘lmagan. Yonib ketgan “Nexia-2” jiddiy shikastlangan.