Braziliya Kopa Amerikani tark etdi

Doimiy to‘xtalishlar va ko‘p miqdordagi follardan ijodkor futbolchilar aziyat chekdi. Dastlabki yarim soatda Urugvay ham, Braziliya ham xavfli vaziyatlar yarata olmadi. Keyin esa urugvayliklar forvardi Darvin Nunes ilk golli vaziyatdan foydalana olmadi. Braziliya jarima maydoniga uzatmadan keyin u yolg‘iz qoldirilgandi, ammo uning bosh bilan yo‘llagan zarbasi to‘sin ustidan o‘tib ketdi. Bunga javoban brazillar ham o‘z vaziyatiga ega bo‘ldi. Rafinya Urugvay jarima maydonida to‘p bilan ta’minlandi, ammo darvozabon Serxio Rochet jamoasini qutqardi. Ko‘p o‘tmay brazillar vingeri yana shunday vaziyatga ega bo‘ldi – ammo yana foydalana olmadi.

Birinchi bo‘limdagi yodda qolarli yana bir vaziyat urugvayliklar himoyachisi Ronald Arauho jarohat olishi bo‘ldi. U bel sohasidagi jarohat tufayli maydonni tark etishiga to‘g‘ri keldi.

Dastlabki 45 daqiqalikda oz bo‘lsa-da xavfli vaziyatlar yaratilgan bo‘lsa, ikkinchi bo‘lim haqiqiy qirpichoqqa aylandi. Braziliya va Urugvay futbol bilan emas, to‘p ishtirokidagi yakkakurash sporti bilan shug‘ullandi. Endi hakam kartochka tarqatishdan tortinib o‘tirmadi va uch marta sariq kartochkalarni cho‘ntagidan chiqardi. 74-daqiqada esa qizil kartochka ham. Urugvayning o‘ng qanot himoyachisi Naitan Nandes Rodrigo Goesga ortdan zarba berdi. U brazillar vingeriga og‘ir jarohat yetkazishi ham mumkin edi. Avvaliga Nandesga sariq ko‘rsatilgandi, videotakrordan keyin esa arbitr qarorini o‘zgartirib, urugvaylik futbolchini maydondan chetlatdi.

Urugvay bosh murabbiyi Marselo Biyelsa futbolchi almashtirishlar orqali o‘yinga ta’sir ko‘rsatdi. Dorival Junior esa maydonda ilk daqiqalardan harakat qilgan boshlang‘ich tarkibga ishonishda davom etdi. Holbuki Amerika Kubogida qo‘shimcha bo‘limlarda vaziyatni o‘zgartirish imkoni yo‘q, chunki turnirda overtaymlar bo‘lmaydi, darhol penaltilar seriyasiga o‘tiladi. Shunday ekan, Braziliya bosh murabbiyi yangi futbolchilar bilan o‘yinni kuchaytirishga urinmagani tushunarsiz. U faqat 81-daqiqaga borib uchtalik almashtirish qildi: Andreas Pereyra, Duglas Luis va Savio tushdi. Uning Kopa Amerika davomidagi harakatlari va qarorlarini tushunish qiyin bo‘lmoqda.

Son jihatdan ustunligiga qaramay, Braziliya Urugvayni bosib tashlay olmadi. Jamoa umuman raqib jarima maydonini shturm qilmadi. Urugvayliklar raqib hujumlarini katta qiyinchiliksiz bartaraf etdi. Braziliya hujum chizig‘ida qator kuchli ijrochilarga ega bo‘lishiga qaramay, murabbiy ularning imkoniyatidan foydalana olmayapti.

O‘yindan keyingi penaltilar seriyasida esa Urugvay ustun keldi. Braziliyada himoyachi Eder Militao va tayanch yarimhimoyachisi Duglas Luis xato zarba berdi: ulardan birinchisining yomon zarbasini Rochet oson qaytardi, ikkinchisining zarbasi esa ustunga tegdi. Alison Xose Mariya Himenesning zarbasini qaytarib, umid paydo qilgandi. Ammo Manuel Ugarte yakuniy natijani o‘rnatdi – 4:2.

Braziliya turnir davomida zerikarli va kuchsiz o‘yin ko‘rsatib, haqli ravishda uyiga qaytdi. Endi muxlislar finalda Argentinaga qarshi klassikaga guvoh bo‘lishmaydi. Shu bilan birga, brazillarning hozirgi jamoasi hal qiluvchi bahsga chiqib borishi adolatsizlik bo‘lgan bo‘lardi. Rahbariyat Dorival Juniorni bosh murabbiy lavozimida qoldirish masalasini qayta ko‘rib chiqishi kerak bo‘ladi. Bu natijaning yana bir jihati: Vinisiusning «Oltin to‘p» uchun imkoniyati keskin pasaydi. U endi qit’a chempionligi uchun imkoniyatini yo‘qotdi, bir kun oldin Argentina bilan penaltilar seriyasida Ekvadorni mag‘lub etgan Messi esa – yo‘q.

Mag‘lubiyatsiz 27 o‘yin

Kolumbiya – Panama 5:0
Gollar: 1:0 – 8 Kordoba, 2:0 – 15, penalti Hames, 3:0 – 41 Dias, 4:0 – 70 Rios, 5:0 – 90+4, penalti Borxa.
Kolumbiya – Vargas, Munos (Aryas, 73), Sanches, Kuesta, Moxika, Uribe, Aryas (Karraskal, 66), Rios, Hames (Kintero, 73), Dias (Sinisterra, 65), Kordoba (Borha, 79).
Panama – Moskera, Blekmen (Gerrero, 46), Murillo, Miller (Harvi, 46), Kordoba, Farinya, Devis (Valensiya, 83), Kristian Martines (Ayyarsa, 62), Uelsh, Fahardo (Dias, 85), Barsenas.
Ogohlantirishlar: Uribe (45), Uelsh (54), Farinya (64), Kordoba (90+2).

Guruh bosqichida sensatsiya ko‘tarib, AQShni ortda qoldirgan holda ikkinchi o‘rin bilan chiqqan Panama pley-offning ilk bosqichidayoq sharmandali hisobda yutqazdi.

O‘yin startidayoq Hames Rodrigesning burchakdan uzatgan to‘pini Kordoba darvoza to‘riga yo‘llab, hisobni ochdi. Hames bu turnirda o‘z faoliyatining eng yaxshi davrlaridagi kabi o‘ynamoqda, Panamaga qarshi o‘yinning birinchi bo‘limidayoq sardor Kolumbiyaga yarimfinal yo‘llanmasini kafolatladi. Samarali kornerdan yetti daqiqa o‘tib u penaltini benuqson ijro etdi. Favoritning uchinchi goli esa — bir vaqtning o‘zida o‘yinning bezagi va panamaliklarning haqiqiy darajasini ifodalovchi vaziyat bo‘ldi. Panamalik futbolchilar kolumbiyaliklar maydonning o‘z tomonidagi qismidan jarima zarbasini qanday ijro etishini o‘ylab turganida Hames bir harakatda to‘pni himoyachilar ortiga tashlab berdi, Luis Dias esa to‘pni darvozabon ustidan oshirib, to‘rga joyladi va tribunada o‘tirgan otasini xursand qildi.

Shu bilan birga, Panama birinchi bo‘lim davomida kuchli daqiqalarni ham o‘tkazdi va kamida bitta golga loyiq o‘ynadi. Kolumbiyaliklarni yoqimsiz holatdan ustun va Vargasning reaksiyasi qutqardi. Natijada tabloda 2:1 o‘rniga 3:0 hisobi porlay boshladi va Nestor Lorenso jamoasidan ikkinchi bo‘limda xotirjamlik bilan g‘alabani ushlab qolish talab etilardi. Ammo favorit tempni pasaytirish haqida o‘ylamadi va hisobni yirik darajaga keltirdi (turnirda o‘n yil ichidagi eng yirik hisob).

To‘rtinchi gol urilgan vaziyatda raqib jarima maydonida Munyosga qo‘pollik ishlatildi, ammo to‘p kolumbiyaliklarda qolgani uchun bosh hakam hushtagini chalishga shoshilmadi, to‘pga ega chiqqan Rios esa jarima maydoni tashqarisidan raketa zarbasi bilan darvoza to‘rini ishg‘ol etdi. Qo‘shimcha daqiqalarda esa panamaliklar darvozasiga yana bir bor 11 metrlik jarima zarbasi belgilandi va Borha Kolumbiyaning Amerika Kuboklari tarixidagi eng yirik g‘alabasini rasmiylashtiri. Bu jamoa 27 o‘yindan buyon mag‘lubiyat bilmayapti va o‘z soch turmagi bilan hamon tribunalarga keladigan kolumbiyalik muxlislarni ilhomlantiradigan Karlos Valderamma avlodi davrida o‘rnatilgan rekordni takrorladi.

Yarimfinal juftliklari (Toshkent vaqti bilan):

• 10 iyul. Argentina — Kanada (5:00)
• 11 iyul. Urugvay — Kolumbiya (5:00)