2024 yilda RF xarajatlari 1,5 trln rublga oshishi mumkin

Rossiya 2024 yilda budjet xarajatlarini 1,5 trillion rublga oshirishi mumkin. Bu haqda Rossiya moliya vaziri Anton Siluanov RBK'ga bergan intervyusida gapirdi. Uning so‘zlariga ko‘ra, tegishli taklif parlamentga allaqachon kiritilgan va bu yil davomida «rejadan tashqari xarajatlar» yuzaga kelgani bilan bog‘liq.

So‘ralgan mablag‘ning katta qismi Markaziy bank tomonidan asosiy stavkaning oshishi fonida imtiyozli ipoteka kreditlarini subsidiyalashga yo‘naltirilishi rejalashtirilgan, dedi Siluanov. «6 foiz oilaviy stavkada yoki 8 foiz imtiyozli ipoteka kreditini olgan odamlar, ular uchun stavkalar barqaror bo‘lib qoladi, shuning uchun biz budjetdan bir trillion rubldan ko‘proq pul olamiz. U odamlarning ipoteka kreditlari stavkasi o‘zgarmasligi uchun yo‘naltiriladi», — deya vazirning so‘zlarini keltiradi RBK.

Qolgan xarajatlar davlat qarziga xizmat ko‘rsatish xarajatlarining oshishi, shuningdek, Rossiya Mudofaa vazirligi va boshqa huquqni muhofaza qilish organlarining ehtiyojlari bilan bog‘liq. «Ehtimol, eng muhimi — bu maxsus harbiy operatsiyaning vazifalari. Biz birinchi navbatda frontda muvaffaqiyatni ta’minlash uchun Mudofaa vazirligining har qanday ehtiyojlarini moliyalashtiramiz», dedi vazir.

Shu bilan birga, Siluanovning so‘zlariga ko‘ra, yakunda hukumat 2024 yil oxirigacha 1,5 trillion rubldan kam mablag‘ sarflashi mumkin.

Rossiya «do‘st bo‘lmagan» davlatlar kompaniyalariga aktivlarini sotishni qiyinlashtiradi

Rossiya Federatsiyasida chet elliklar tomonidan aktivlarni sotish bilan bog‘liq operatsiyalar uchun minimal chegirma 60 foizgacha oshdi. Bu haqda jurnalistlarga Rossiya moliya vaziri Anton Siluanov ma’lum qildi.

«Chet elliklar uchun diskont 50 foizdan 60 foizgacha ko‘tarilmoqda», deya Siluanovning so‘zlaridan iqtibos keltirgan Rossiya OAV. 

Vazirning so‘zlariga ko‘ra, chet elliklar tomonidan Rossiyadagi biznesni sotish bilan bog‘liq bitimlar uchun budjetga to‘lanadigan hissa 15 foizdan 35 foizgacha oshadi. «15 foizdan 25 foizgacha darhol, plyus bir yilda besh foiz va keyingi yilda besh foiz, jami 35 foiz», deb tushuntirdi Siluanov.

Ukrainada mojaro boshlanganidan keyin mamlakatni tark etishga qaror qilgan ko‘plab G‘arb kompaniyalarining Rossiyadagi aktivlarini sotish tartibi 2022 yildan kuchga kirdi. Savdo tartib-qoidalariga rioya qilish va korxonalarning moliyaviy barqarorligini ta’minlash maqsadida Siluanov raisligida hukumat komissiyasi tuzildi.