O‘zbekiston va Shveytsariya shartnomaviy-huquqiy bazani kengaytirishga kelishib oldi

Onlayn formatda ikki davlat Tashqi ishlar vazirligining tegishli boshqarmalari rahbarlari ishtirokida O‘zbekiston-Shveytsariya siyosiy maslahatlashuvlarining yettinchi davrasi bo‘lib o‘tdi.

TIV ma’lumotiga ko‘ra, O‘zbekiston bilan Shveytsariya o‘rtasidagi turli sohalardagi ko‘p qirrali munosabatlarning holati va yanada rivojlantirish istiqbollari muhokama qilindi.

Savdo-iqtisodiy, sarmoyaviy, moliyaviy-texnikaviy va madaniy-gumanitar sohalarda, shuningdek, xalqaro tashkilotlar doirasida o‘zaro manfaatli hamkorlikni mustahkamlashga alohida e’tibor qaratildi.

Tomonlar turli darajadagi o‘zaro tashrif va tadbirlarni birgalikda rivojlantirish, ikki tomonlama munosabatlarning shartnomaviy-huquqiy bazasini kengaytirish, shuningdek, siyosiy maslahatlashuvlarning navbatdagi davrasini 2025 yilda Bern shahrida o‘tkazishga kelishib oldilar.

O‘zbekiston va Shveytsariya o‘rtasidagi diplomatik munosabatlar 1992 yil 7 mayda o‘rnatilgan.