AQSh Suriyada IShIDning 75 tadan ortiq obektiga zarba berdi

Bashar Asad rejimi qulagach, AQSh kuchlari 8 dekabr, yakshanba kuni Suriyaning markaziy qismidagi IShIDning 75 dan ortiq obektlariga zarbalar berdi. Hujumdan maqsad IShIDning mamlakatdagi mavjud beqaror vaziyatdan foydalanishga urinishlarining oldini olish edi, deya tushuntirdi AQSh Markaziy qo‘mondonligi (CENTCOM).

Operatsiyada B-52 strategik bombardimonchi samolyotlari, F-15 qiruvchi samolyotlari va A-10 hujumkor samolyotlari ishtirok etdi. «Suriyadagi barcha guruhlar, agar ular IShID bilan hamkorlik qilsa yoki biron-bir tarzda qo‘llab-quvvatlasa, biz ularni javobgarlikka tortishimizni tushunishi kerak», dedi CENTCOM qo‘mondoni Maykl Kurilla matbuot bayonotida.

Avvalroq AQSh prezidenti Jo Bayden Suriyada Asad rejimining qulashini «asosiy adolat akti» va shu bilan birga, «xatar lahzasi» deb atagan edi. «IShID hozirgi vaziyatdan foydalanishga harakat qiladi va bo‘shliqni to‘ldirishga urinadi, biz bunga yo‘l qo‘ymaymiz», dedi u Oq uydagi nutqi chog‘ida. U, shuningdek, Asadni hokimiyatdan mahrum qilgan ba’zi guruhlar o‘tmishda terrorizm va inson huquqlari buzilishiga aloqador bo‘lganini qo‘shimcha qildi.

Suriyada isyonchilar hokimiyatni egalladi

Qurolli guruhlar noyabr oyi oxirida Suriya prezidenti Bashar Asad hukumat kuchlariga qarshi keng ko‘lamli hujum boshladi. Bir necha kun ichida ular bir qancha yirik shaharlarni nazorat ostiga olishga muvaffaq bo‘lishdi. 8 dekabr kuni Suriya isyonchilari davlat televideniyesi orqali poytaxt Damashqqa kirib, Bashar Asad rejimini ag‘darganliklarini e’lon qildi. Damashqqa yurish bilan bir vaqtda isyonchilar ittifoqi mamlakatning shimoli va shimoli-sharqiga yo‘l oldi.

Rossiya TIV ma’lumotlariga ko‘ra, Asad «prezidentlik lavozimini tark etishga qaror qilgan» va Suriyani tark etgan. TASS agentligi o‘z manbalariga tayanib, u oilasi bilan Moskvada ekanini ma’lum qildi.