Malayziyada Abu Rayhon Beruniy asarining qadimiy qo‘lyozmasi saqlanayotgani aniqlandi

Malayziya poytaxti Kuala-Lampur shahridagi kutubxonada Abu Rayhon Beruniy asarining qadimiy qo‘lyozmasi saqlanayotgani ma’lum bo‘ldi. Bu haqda “Dunyo” axborot agentligi xabar bermoqda.

Ma’lum qilinishicha, Malayziyada xizmat safari bilan bo‘lib turgan O‘zbekistondagi Islom sivilizatsiyasi markazi rahbari o‘rinbosari Firdavs Halimov Xalqaro islom tafakkuri va sivilizatsiyasi instituti direktori Abdelaziz Bergut bilan uchrashuv o‘tkazgan.

Abdelaziz Bergut Xalqaro islom tafakkuri va sivilizatsiya institutining kutubxona fondi, mavjud bir qator nodir qo‘lyozma va eksponatlar bilan mehmonlarni tanishtirgan.

U kutubxonada nodir qo‘lyozmalar – Abu Rayhon Beruniyning astronomiya ilmiga oid 1197 yilga mansub “Kitob al-Tafhim” asari va Abulqosim Firdavsiyning 1612 yilga oid “Shohnoma” asarlari saqlanayotgani haqida aytib o‘tgan.

Mazkur asarlar 20-asr oxirlarida Yevropa auksionlarida xarid qilingani ma’lum qilingan.

Muloqot davomida O‘zbekiston zaminida yetishib chiqqan buyuk allomalar merosini o‘rganish, nodir manbalarni tadqiq etish, noyob qo‘lyozmalarni faksimile nusxasini yaratish, qo‘shma ilmiy tadqiqot va anjumanlar o‘tkazish kabi yo‘nalishlarda hamkorlik rejalari ko‘rib chiqilgan.

Kuala-Lumpur shahrida O‘zbekistondagi Islom sivilizatsiyasi markazi bilan birgalikda Beruniy ilmiy merosiga bag‘ishlangan xalqaro konferensiya tashkil etish to‘g‘risida kelishuvga erishilgan.