Qibrayda Qozog‘istondan tortilgan yashirin yerosti quvuri aniqlandi

Qibray tumanida Qozog‘istondan O‘zbekiston hududiga tortilgan yashirin quvur aniqlandi. Bu haqda Bojxona qo‘mitasi axborot xizmati xabar berdi.

Ma’lum qilinishicha, 26 dekabr kuni Bojxona qo‘mitasi va uning Toshkent viloyati bo‘yicha boshqarmasi tezkor xodimlari tomonidan O‘zbekiston va Qozog‘istonning tegishli huquqni muhofaza qiluvchi organlari bilan hamkorlikda transchegaraviy jinoiy guruh fosh qilingan. Ushbu guruh Qozog‘istondan O‘zbekistonga noqonuniy yo‘llar bilan yonilg‘i (benzin) mahsulotlarini olib o‘tish bilan shug‘ullangan.

O‘tkazilgan tezkor-qidiruv tadbirlari davomida Toshkent viloyatining Qibray tumanida joylashgan qoramol fermasi ko‘zdan kechirilgan. Jarayonda Qozog‘iston hududidan O‘zbekiston hududiga yonilg‘i mahsulotlarini noqonuniy o‘tkazishga mo‘ljallangan, O‘zbekiston tomondagi qismi taxminan 500 metr uzunlikda bo‘lgan yashirin quvur borligi aniqlangan.

Hozirda holatga aloqador bo‘lgan shaxslar bo‘yicha tezkor-qidiruv tadbirlari davom ettirilmoqda.

Qozog‘istonning Turkiston viloyati prokuraturasi matbuot xizmatiga ko‘ra, yashirin quvurning Qozog‘iston tomondagi qismi 450 metr bo‘lgan va u orqali har kuni 5-7 tonna yoqilg‘i-moylash materiallari yashirincha tashilgan.

Oldinroq Toshkent viloyatining Qozog‘iston bilan chegara hududida 310 metrli noqonuniy tunnel aniqlangandi. O‘shanda o‘tkazilgan tezkor tadbirda Hindistondan Qozog‘iston orqali mamlakatga katta miqdorda sifati kafolatlanmagan dori vositalarini noqonuniy o‘tkazish bilan shug‘ullangan transchegaraviy jinoiy guruh faoliyati fosh etilgan.