Nepal Everestga chiqish narxini 15 ming dollargacha oshirdi

Nepal hukumati xorijliklar uchun Everest cho‘qqisiga chiqish to‘lovlarini oshirdi va dunyodagi eng baland tog‘da chiqindilar va baxtsiz hodisalarga qarshi kurashga qaratilgan bir qator chora-tadbirlarni joriy qildi. Bu haqda The Kathimandu Post mamlakat hukumati qaroriga tayanib xabar berdi.

Yangi qoidalarga ko‘ra, chet elliklar uchun bahor mavsumida (mart-may) cho‘qqiga chiqish uchun to‘lov 11 ming dollardan 15 ming dollarga, kuz mavsumida (sentabr-noyabr) 5,5 ming dollardan 7,5 ming dollarga, qishda (dekabr-fevral) va yomg‘irli mavsumda (iyun-avgust) - 2,75 ming dollardan 3,75 ming dollargacha ko‘tarilgan.

Vazirlar Mahkamasi, shuningdek, balandligi 8000 metrdan ortiq bo‘lgan istalgan tog‘ga, jumladan Everestga (janubiy cho‘qqi 8760 metr balandlikda) chiqish uchun har ikki alpinist gid yollashi kerak degan qarorga keldi.

Hujjatga ko‘ra, bahor fasli boshlanishi bilan alpinistlar chiqindilarni utilizatsiya qilish uchun tog‘ etagidagi lagerga olib tushishi, shuningdek, chiqindilarni yuqoriroq nuqtalarda to‘plash uchun biologik parchalanadigan qoplarni olib yurishi ham talab qilinadi.

Nepalda tog‘ cho‘qqilariga chiqish paytida alpinistlar bilan bog‘liq baxtsiz hodisalar muntazam ravishda sodir bo‘ladi. 2023 yilda Everestda 18 kishi halok bo‘ldi, bu 70 yillik rekord ko‘rsatkich hisoblanadi. 2024 yilda Everestda 8 kishi halok bo‘ldi, ulardan 3 nafari bedarak yo‘qolgan deb taxmin qilinmoqda.

1920 yillarda Everestga birinchi ko‘tarilish boshlanganidan beri 300 nafardan ortiq odam halok bo‘lgan. O‘limning asosiy sabablari - qor ko‘chkilari, qulashlar, muzliklarning qulashi, ekstremal ob-havo sharoitlari ta’siri va balandlik kasalligi.