«Xuddi paraddagidek borishgan». Kursk oblastida Rossiya tank kolonnasi yakson etilishi z-blogerlarni g‘azablantirmoqda

Rossiya zirhli tanklari kolonnasi Ukraina qurolli kuchlari nazorati ostidagi Sudja shahri shimolidagi Nikolskiy posyolkasi hududida tor-mor etilgani aks etgan kadrlar ijtimoiy tarmoqlarda 16 fevral kuni paydo bo‘ldi.

«Hozir Nikolskiy atrofida shunchaki ****** ro‘y bermoqda. 155-brigadaning qizil bayroqlar ostidagi kolonnasi xuddi paraddagi kabi minalangan yo‘l bo‘ylab [ukrain] dronlari to‘dalanib turgan joyga qarab yo‘l oldi!!! Ko‘zlaringizni ishqalamang, biz barchasini to‘g‘ri yozdik — aynan G‘alaba qizil bayroqlari bilan va aynan minalangan yo‘l bo‘ylab», — deya yozgan «Severniy kanal» telegram-kanali.

Kadrlarda dronlarga qarshi to‘rlar o‘rnatilgan Rossiya tanklari va zirhli transportyorlari qorli dala bo‘ylab harakatlanib, birin-ketin portlab ketayotganini ko‘rish mumkin.

«Avvaliga bu xabarga shubha bilan qaradim. Keyin joylardagi tanishlaridan surishtirdim, hammasi tasdiqlandi. Chindan ham, aqldan ozgan boboylar G‘alaba bayroqlarini texnikaga o‘rnatishga majbur qilishgan, shundan so‘ng kolonnani to‘g‘ridan to‘g‘ri Kursk oblastidagi minglab FPV-dronlari zarbalari ostida minalangan maydonga jo‘natishgan», — deya yozgan Z-bloger Alex Parker Returns.

«Mashinalarning bir qismi zarbaga uchragan va desant shoshilinch tarzda ortga qaytishga majbur bo‘lgan. Kolonnaning omon qolgan qismi esa biroz uzoqroqqa borgan, biroq oxir-oqibat ular ham sezilarli darajada ilgarilay olmagan va texnikalar boy berilgan», — deya tan oladi «Voyenniy osvedomitel» telegram-kanali.

Z-blogerlarga ko‘ra, Rossiya tank hujumidan oldin shimoliy koreyalik piyodalar hujum uyushtirgan.

«Severniy kanal» telegram-kanaliga ko‘ra, reja «pauzali ikkita to‘lqin bilan hujum qilish»dan iborat bo‘lgan bo‘lishi mumkin: birinchi to‘lqin Ukraina mudofaasini holdan toydirishi kerak edi, 155-brigadaning ikkinchi kolonnasiga esa, aftidan, shimoliy koreyalik harbiylar yordamida bo‘shliqni yorib o‘tish topshirilgan.

Videolarda Rossiya zirhli texnikalaridan tashqari qorda emaklayotgan piyodalar ham dronlar tomonidan yo‘q qilingani aks etgan.

Va bu shu kabi birinchi holat emasdi.

«Bir necha oy oldin 810-[brigada] ham xuddi shu tarzda Pogrebki yaqinida minalarga tushib qolgandi. Nahotki o‘sha yo‘qotishlar hech kimni hech narsaga o‘rgatmagan bo‘lsa?» — deya achchiqlanadi «Severniy kanal» muallifi.

Ukrainlar nima demoqda?

Voqealar ishtirokchisi, DroneBomber telegram-kanalini yurituvchi ukrain harbiysiga ko‘ra, Ukraina qurolli kuchlari bir necha kun oldin Rossiyaning 155-brigadasi hujumga o‘tmoqchiligidan xabardor bo‘lgan, ammo amaliyot qandaydir sabablarga ko‘ra kechiktirilgan. Hujum boshlanganida esa ukrainlar mudofaaga shay holatda edi.

«155-komandirlari yo‘llar minalashtirilmagani, shunday ekan bemalol harakatlanish mumkinligi haqida hisobot berishgan. Kolonna radioelektron kurash vositalari bilan himoyalangan, ammo u juda yomon ishlagan. Biz optik tolali dronlar bilan ham, ayrim sirlari bo‘lgan oddiy FPV-dronlar bilan ham ishladik», — deya yozgan u.

Ukrainalik harbiy sharhlovchi Sergey Morfinovning so‘zlariga ko‘ra, mudofaa uchun muhandislik tayyorgarlik omili — ayniqsa mina to‘siqlari juda samarali bo‘lgan, uning ma’lumotlariga ko‘ra, minalar masofadan, shu jumladan og‘ir dronlar yordamida o‘rnatilgan.

«Shuning uchun „bronetexnika dronlarga qarshi“ raqobatida yana ikkinchisi g‘alaba qozondi. Bu qarama-qarshilik bundan keyin ham zamonaviy urushning asosiy tendensiyalaridan biri va harbiy muhandislar uchun eng yangi „qurollanish poygasi“ bo‘lib qoladi», — deydi Morfinov.

Qo‘qqisdan hujum qilish va soddalik omili

BBC rus xizmati harbiy sharhlovchisi Ilya Abishev:

Rossiya-Ukraina urushi sharoitida tomonlarning hech biri jang maydonida hal qiluvchi ustunlikka erishishning samarali usullariga ega emas.

Bu birinchi navbatda hujumga o‘tilganda o‘t ochib qo‘llab-quvvatlash vositalaridan yoppasiga foydalanish va o‘t ochishning yuqori zichligini yaratishning imkoni yo‘qligi bilan bog‘liq.

Artilleriya zaif — batareyaga qarshi kurash vositalari, xuddi shunday 40 km va undan ortiq radiusli zarba beruvchi dronlar uni tezda zararsizlantirishga qodir.

Jangovar aviatsiya bilan vaziyat ham taxminan shunday — dushman mudofaa chizig‘ini havo hujumidan mudofaa vositalari bilan qoplagani tufayli uchoqlar uzoq masofadan harakat qilishga majbur bo‘ladi, bu esa uning samaradorligini sezilarli darajada pasaytiradi.

Aslida, so‘nggi bir-bir yarim yil ichida hujum harakatlari ikki usulda olib borilmoqda: yoki kichik piyoda guruhlarining sezdirmasdan kirib borishi hamda mustahkam o‘rnashishi va son jihatdan kuchaytirilishi yoki dushmanning o‘t ochish nazorati ostida bo‘lgan jangovar pozitsiyalar oldidagi front zonasini tezda yengib o‘tishga urinish.

Buning uchun mavjud har qanday transport vositalari — mototsikllar, baggilar, fuqarolik avtomobillari, shuningdek, shtatdagi zirhli transport vositalaridan foydalanish mumkin.

Ikkala variantda ham qo‘qqisdan hujum qilish omili hal qiluvchi ahamiyatga ega, ammo ikkinchi holatda unga erishish qiyin.

Jang maydoni kecha-yu kunduz nazorat qilinadi, dushman o‘nlab texnikalarning oldinga siljishini o‘z vaqtida payqamasligiga va ularga qo‘lidagi barcha vositalar bilan zarba bermasligidan umid qilish o‘taketgan soddalik bo‘ladi. Ayniqsa, hujum kuppa-kunduzi bayramona qizil bayroqlar ostida amalga oshirilganida.