«Manchester Siti» «Liverpul»ga qarshi, «Chelsi» va «Bavariya»da ham jiddiy sinov. Hafta o‘yinlari anonsi

ASTON VILLA – CheLSI (22 fevral, 22:30)

«Chelsi» Angliya Premer Ligasi doirasidagi oxirgi 9 o‘yinda atigi 2 o‘yinda g‘alaba qozondi. Tabiiyki, bu natijalar yaqindagina top-4 uchun favorit bo‘lgan londonliklarning imkoniyatini pasaytirib yubordi. Hatto Enso Mareskaga nisbatan bosim ortib, iste’fo haqida ham fikrlar yangray boshlaganini aytish mumkin.

Ammo bu yerda muhim jihatni e’tiborga olish kerak. Yaqinda «Chelsi» sobiq futbolchisi Jon Obi Mikel bugungi holatning asosiy aybdori sifatida murabbiyni emas, ushbu tarkibni yiqqanlarni ko‘rsatish kerakligi haqida mulohazalari bilan o‘rtoqlashgandi. Jonnning aytishicha, tarkib har qancha kuchli, iqtidorli futbolchilardan tashkil topgan bo‘lmasin, maydonda tajribali futbolchilar ham bo‘lishi shartligini ta’kidladi. Rostan ham o‘sha Abramovichning ilk yillarida ham, yaqinda Chempionlar Ligasini yutgan tarkibda ham yoshlar bilan bir qatorda har chiziqda tajribali futbolchilar o‘ynaganini eslasangiz kerak.

«Aston Villa» mana shunday qiyin paytda qarshi o‘ynash uchun eng noqulay jamoalardan biri ekani shubhasiz. Emeri shogirdlari uch kun oldin «Liverpul»ga ham munosib qarshilik ko‘rsatib, ochko olishning uddasidan chiqishdi. Tarkibga yangi qo‘shilgan Reshford, Asensio kabi futbolchilar o‘yinga yangi chizgilarni qo‘shib, «Aston Villa»ni yanada xavfliroq jamoaga aylantirayotgani ham bor gap. Birinchi davrada Londonda mezbonlar 3:0 hisobida g‘alaba qozongani ham «Aston Villa»ga qo‘shimcha motivatsiya beradi.

Mehmonlarga yordam berishi mumkin bo‘lgan faktor esa yuqorida eslab o‘tilgan o‘yin – «Aston Villa» uch kun oldin «Liverpul» bilan qiyin uchrashuv o‘tkazdi, tabiiyki, jismoniy tomondan «Chelsi»ga nisbatan yomonroq holatda bo‘lishi tabiiy. Umuman Emeri jamoasi uch kunda bir rejimda yaxshi natijalar qayd eta olmayotgani avval ham e’tirof etilgandi. Masalan, jamoa hafta o‘rtasida Chempionlar Ligasida uchrashuv o‘tkazgan haftalarda APL o‘yinida ochko yo‘qotgan. Asosan bir xil tarkibda harakat qiladigan «Aston Villa» uchun bu rejim ancha noqulaylik tug‘diradi.

Jarohatlar borasida har ikki tomonda yetarlicha muammolar bor. Leon Beyli, Onana, Pau Torres kabi futbolchilar mezbonlar tarkibida har chiziqdagi yetakchi futbolchilardir. Shuningdek, Kamara va Ross Barkli ham sheriklariga yordam bera olishmaydi. «Chelsi» esa so‘nggi o‘yinlarda ham Jyeksonni, ham Maduekeni yo‘qotdi – hujum chizig‘i uchun jiddiy zarba. Badiashil, Fofana, Laviya kabi futbolchilar ham jarohat tufayli sheriklariga yordam bera olishmaydi.

NYuKASL – NOTTINGHeM FOReST (23 fevral, 19:00)

Angliyada jismoniy tomondan eng yuqori ko‘rsatkichlarga ega bo‘lgan bu ikki jamoaning o‘zaro jangi tomosha qilish uchun eng munosib uchrashuvlardan biri bo‘lishiga shubha yo‘q. «Nyukasl» g‘alaba qozongan taqdirda «Nottinghem»ga 3 ochko masofaga yaqinlashib oladi va tabiiyki, Chempionlar Ligasi yo‘llanmasi uchun kurashda jiddiy raqobatga kirishadi.

«Nottinghem» bundan keyingi o‘yinlarni «Arsenal» va «Manchester Siti»ga qarshi o‘ynashini e’tiborga olsak, jamoa uchun eng mas’uliyatli davr boshlanmoqda. Aynan shu o‘yinlarda jamoa mavsum oxiri uchun maqsadini jiddiy namoyish qilishi mumkin. Ochkolar yo‘qotilsa, top-4 dan chiqib ketib qolinadi va keyin «Siti», «Chelsi» kabi jamoalarga qarshi raqobat qilish yanada qiyinlashib ketadi.

O‘z navbatida «Nyukasl» o‘yinlarida beqarorlik paydo bo‘lganini ham ta’kidlash lozim. Jamoa o‘z uyidagi oxirgi ikki o‘yinni «Bornmut» va «Fulhem»ga yutqazib qo‘ydi. Orada esa, «Arsenal»ni Liga kubogi yarimfinalida mag‘lub etib, so‘nggi uch yilda ikkinchi marta ushbu musobaqa finaliga chiqdi. Eddi Xau jamoasi hali ham barqaror ochkolarni butun mavsum qo‘lga kiritib bormasa-da, alohida o‘yinlarga o‘zgacha tayyorlanib, juda kuchli bo‘la olishlarini doim isbotlab kelishgan.

Yaqinda mavsum uchun statistik ma’lumotlar e’lon qilinganda «Nottinghem» yugurish bo‘yicha ancha past ko‘rsatkich qayd etgani ma’lum bo‘lgandi. Bir qaraganda paradoksal holat, zero nisbatan kamtar tarkib bilan yuqorida yurish uchun jamoa ancha ko‘p ter to‘kishi kerakdek. Ammo bu yerda ikki asosiy jihat bor. Birinchidan, «Nottinghem» juda zich sxemada harakat qiladi, bu esa, maydon bo‘ylab ortiqcha yugurmasdan to‘pni egallab olish imkonini beradi. Ikkinchidan esa realizatsiya ko‘rsatkichlarining yuqori ekani ham jamoaning natijalariga zamin yaratmoqda. APLning joriy mavsumdagi ikki muvaffaqiyatli hujumchilari Aleksandr Isaak va Kris Vudning o‘ziga xos dueli ham muxlislar uchun juda qiziq bo‘lsa kerak.

«Nottinghem»ning yuqorida tilga olingan uslubi tarkibning ko‘p jarohat olishidan ham asrayotgani shubhasiz. Jamoa tarkibida deyarli yo‘qotishlar ko‘p, faqat zaxiradan maydonga tushib turadigan Tayvo Avoniyining holati biroz so‘roq ostida xolos. Mezbonlardan esa Botman, Barns va Lasselsdan tashqari ayniqsa Joalintonning yo‘qligi eng katta yo‘qotish bo‘lsa kerak. Tonali va Gimaraysh bilan birgalikda braziliyalik yarimhimoyachi «Nyukasl»da Angliyaning eng yaxshi uchliklaridan birini tashkil qilar edi.

BAVARIYa – AYNTRAXT (23 fevral, 21:30)

«Bavariya» Bundesligada ancha komfort farq bilan chempionlik sari odimlayotgan bo‘lsa-da, so‘nggi paytlarda asabiylashayotganini ham ta’kidlash kerak. Ayniqsa, «Bayyer» bilan o‘yinda liverkuzenliklar Kompani shogirdlaridan bir bosh baland to‘p surishdi. Butun o‘yin davomida «Bavariya» atigi ikkita noaniq zarba bilan kifoyalangani jamoada muammolar borligini, ayniqsa, Chempionlar Ligasidagi muhim o‘yinlar oldidan nimanidir tuzatish lozimligini namoyish qilib berdi. Nafaqat «Bayyer» bilan, «Seltik» bilan har ikki o‘yinda ham jamoa ishonchli ko‘rinmadi. Shotlandiyadagi bahsda «Seltik» o‘yin tomonidan ham ustunlik qilgan bo‘lsa, javob o‘yinida faqat so‘nggi daqiqalardagi gol «Bavariya»ni qo‘shimcha vaqtlardan asrab qoldi. Bu holatda «Ayntraxt» bilan o‘yinda ishonchli g‘alaba shart, aks holda allaqachon cho‘ntakda deb hisoblangan Bundesliga chempionligi ham xavf ostida qoladi.

«Ayntraxt» esa ligada ishonch bilan uchinchi o‘rinni egallab turibdi. Jamoa Yevropa Ligasida ham kurashni davom ettiradi. Frankfurt jamoasi uchun juda yaxshi natija. Faqat eng sermahsul futbolchi bo‘lmish Marmushning ketishi so‘nggi paytdagi natijalarga o‘z ta’sirini ko‘rsatganini ham ta’kidlash kerak. Misrlik futbolchi ketganidan so‘ng, jamoa Bundesligadagi oxirgi uch o‘yinni durang bilan yakunladi, Yevropa Ligasida «Roma»ga mag‘lubiyatga uchradi. Faqatgina oxirgi turda so‘nggi o‘rinda borayotgan «xolshteyn» ustidan g‘alaba qozonib, vaziyatni sal o‘nglashdi. Ammo keyingi ikki o‘yin «Bavariya» va «Bayyer» bilan bo‘lib o‘tadi. Bu uchrashuvlarda mag‘lubiyatlar sodir bo‘lsa frankfurtliklar hozirgi pozitsiyasini xavf ostida qoldirishi aniq.

O‘zaro o‘yinlarga kelsak, «Bavariya» va «Ayntraxt» o‘yinlari so‘nggi paytlarda o‘zining tomoshabopligi bilan ajralib turadi. Birinchi davradagi 3:3 ni hali hech kim yodidan chiqargani yo‘q. O‘tgan mavsumda esa Frankfurtdagi uchrashuvda mezbonlar 5:1 hisobida ustun kelgandi. Hatto faqat Myunxendagi o‘yinlarni olsak ham mehmonlar ancha munosib ko‘rinishadi. Masalan, oxirgi uch o‘yinda «Bavariya» faqat bir marta g‘alaba qozongan, bir durang va bir mag‘lubiyat qayd etilgan.

«Seltik»ga qarshi o‘yinda Harri Keyn jarohat oldi va bir necha hafta o‘yinlarda maydnga tusha olmasa kerak. Hujumchidan tashqari Dayot Upambekanoda zo‘riqish borligi aytilmoqda va bu o‘yinda maydonga tushishi so‘roq ostida. Mehmonlar tarkibida esa Ebimbe, Kox va Matanovichdan tashqari «Bavariya»ning sobiq futbolchisi Mario Gyotse ham «Ayntraxt»ga yordam bera olmaydi.

MANCheSTeR SITI – LIVeRPUL (23 fevral, 21:30)

«Manchester Siti» «Nyukasl» bilan o‘yinda go‘yoki bizni o‘sha eski jamoani eslatgan va ancha ishonchli g‘alabaga erishgandi. Ammo Madriddagi o‘yin aksini isbotladi – jamoada muammolar ancha chuqur va bu safar Gvardiola mavsum davomida barchasini o‘nglay olmaydi. Nazarimizda endi u darajada o‘nglash ham shart emas, zero Chempionlar Ligasida kurash to‘xtatilgach, «Manchester Siti» endi faqat APLda kuchli beshlik uchun kurashishi yoki Angliya kubogini qo‘lga kiritishga urinib ko‘rishi mumkin xolos.

«Liverpul»da esa maqsadlar jiddiy. Slot shogirdlari Chempionlar Ligasidagi kurashni davom ettirish bilan birga Angliya chempionatida ham chempionlik yurishini davom ettiradi. So‘nggi turdagi «Aston Villa» maydonidagi durang sal bo‘lsa-da, chempionatda intrigani qaytargandek bo‘ldi. Chunki hozirda yo‘qotilgan ochkolar bo‘yicha «Arsenal» bilan farq atigi 5 ochkoni tashkil qilmoqda. Keyingi ikki turni «Liverpul» «Manchester Siti» va «Nyukasl»ga qarshi o‘tkazishini e’tiborga olsak, mabodo Slot jamoasi ochko yo‘qotadigan bo‘lsa farq minimallashadi. Hali oldinda «Arsenal» bilan o‘zaro o‘yin ham bor, demak agar londonliklar pand yeyishmasa, chempionlik masalasi ko‘pchilik taxmin qilganidek erta yakunlanmasligi mumkin.

Abduqodir Husanov Madriddagi o‘yindan keyin kamida yaqin davr uchun asosiy tarkibdagi o‘rnini egalladi deb bemalol ayta olamiz. Birinchidan, u «Real»ga qarshi qanotda to‘p surib, xuddi Kayl Uoker kabi bu pozitsiyada ham muvaffaqiyatli bo‘la olishini isbotladi. Ikkinchidan, Jon Stounzning jarohat olib uzoq muddatga safdan chiqishi, shundoq ham yetishmovchilik bo‘lgan «Manchester Siti» himoyasiga muammo tug‘dirdi. Gvardiola endi ixtiyoridagi bor himoyachilardan asosiy tarkibda foydalanishga majbur bo‘lib qoladi. Husanov esa ayniqsa, «Liverpul» kabi qanotlarga urg‘u beradigan va tezkor hujum qiladigan raqiblarga qarshi samarali qurol bo‘lishini ko‘rdik. Vinisiusdan keyingi qurbon Luish Dias bo‘lishi mumkin.

Yo‘qotishlar albatta, mehmonlar tarkibida ham bor. So‘nggi paytlarda eng yaxshi formaga chiqa boshlagan Kodi Gakponing ishtiroki hali ham so‘roq ostida qolmoqda. Shuningdek, Gomes va Bredli kabi himoyachilar ham sheriklariga yordam bera olishmaydi.

«Manchester Siti»ning turnir jadvalidagi o‘rni ko‘proq safar o‘yinlaridagi muvaffaqiyatsizliklar evaziga ekanini ham ta’kidlash mumkin. O‘Z maydonidagi natijalar bo‘yicha «Siti» deyarli «Liverpul» darajasida – 12 o‘yindan 8 tasini o‘z foydasiga hal qilgan. «Liverpul» esa safarda hali bu mavsum mag‘lubiyatga uchragani yo‘q. 14 o‘yindan 9 g‘alaba va 5 durang. O‘zaro o‘yinlarda esa so‘nggi paytlarda «Liverpul»da ustunlik kuzatilyapti. Birinchi davrada «Enfild»dagi o‘yin 2:0 hisobida mezbonlarning ishonchli g‘alabasi bilan tugagan bo‘lsa, undan avvalgi ikki o‘yin, jumladan Manchesterdagi uchrashuv ham 1:1 hisobida yakunlangandi.

GALATASAROY – FeNeRBAXChe (24 fevral, 22:00)

Muslera, Sanches, Lemina, Martens, Torreyra, Osimhen, Amrabat, Fred, Tadich, Jyeko, Sent Maksimen, En-Nesiri, Taliska – agar bu futbolchilar hatto Angliya chempionatida bir o‘yinda jamlanishsa ham, albatta, e’tiborga arziydigan yuqori afishali to‘qnashuv bo‘lardi. Agar bu Turkiya chempionatining eng buyuk ikki klubi o‘rtasida, o‘sha biz biladigan muhit ostida, yana chempionlik uchun ahamiyat kasb etadigan to‘qnashuv bo‘lsa, qo‘yaverasiz. Bu o‘yinni o‘tkazib yuborib bo‘lmaydi.

«Galatasaroy» va «Fenerbaxche» o‘rtasidagi ayni paytdagi farq 6 ochkoni tashkil qilmoqda. Ya’ni agar Mourino shogirdlari safar o‘yinida ustun kelishsa, raqibiga 3 ochkogacha yaqinlashib oladi – bu chempionlik intrigasining yanada cho‘qqiga chiqishini anglatadi. «Fenerbaxche» so‘nggi besh yilda Turkiya chempionatida eng ko‘p ochko to‘plagan, ammo har yili kimgadir chempionlikni boy beraverganidan aynan bu masalada strategik yondashadigan murabbiyni olib kelishgandi. Tabiiyki, Mourino nimanidir o‘zgartirishi shart, ya’ni bu safargi kurash avvalgilaridan farq qilishi lozim kamida. «Fenerbaxche» o‘tgan mavsumda 99 ochko jamg‘arishga muvaffaq bo‘lgan – bu natija bilan istalgan boshqa mavsumda yoki boshqa chempionatda jamoa chempion bo‘lishi kerak. Ammo «Galatasaroy» 102 ochko to‘plab, chempionlikni ilib ketgandi. Agar Mourino chempionlik poygasini erta yakunlasa, futbol jamoatchiligida bosim yanayam ortib ketishi shubhasiz.

Ayniqsa, so‘nggi paytlarda hakamlar bilan bog‘liq janjallar, «Adana Demirspor»ning «Galatasaroy»ga qarshi o‘yinni yakunlamasdan maydondan chiqib ketishi bilan bog‘liq voqealar bu o‘yin ahamiyatini yanada oshirib yuboradi. Butun Turkiya, hatto futbolga qiziqmaydiganlar uchun ham e’tibor markazidagi o‘yin bo‘lishi shubhasiz.

Bundan tashqari, «Galatasaroy» hafta o‘rtasida Yevropa Ligasidan chiqib ketdi. «AZ Alkmaar» jamoasiga qarshi o‘yinda kerakli hisobni qayd eta olmadi. «Fenerbaxche» esa bu bosqichdan o‘tib, nimchorak finalga chiqdi. Mana shu faktor ham mezbonlarga muxlislar oldida o‘zini oqlash uchun qo‘shimcha faktor bo‘lib hizmat qiladi. Shuningdek, «Galatasaroy» ushbu mavsum Turkiyada hali mag‘lubiyat nimaligini bilmay kelayotganini ham ta’kidlash lozim. «Fenerbaxche» ikki marta yutqazgan, ulardan biri birinchi davrada aynan «Galatasaroy»dan edi. Bu maydondagi oxirgi o‘yinda esa o‘tgan mavsumda «Fenerbaxche»bir kishi kam bo‘lib o‘ynashiga qaramasdan 1:0 hisobida g‘alaba qozongandi. Gol muallifi bu safargi derbida jarohati tufayli qatnasha olmaydigan Chag‘lar Suyunji tomonidan urilgandi.

Suyunjidan tashqari mehmonlar safida darvozabon Livakovich o‘ynay olmaydi. U mashg‘ulotlarga qaytgan bo‘lsa-da, katta ehtimol bilan asosiy tarkibda tushishga tayyor emas. «Galatasaroy» esa Morata va Ikardi kabi hujumchilarning yordamidan foydalana olmaydi. Shuningdek, Yunus Akgun ham yana kamida bir hafta maydonga tusha olmaydi.

BOShQA O‘YINLAR

22 fevral. Everton – MYu (17:30), ARSeNAL – Vest Hem (20:00), Ipsvich – TOTTeNHEM (20:00), Torino – MILAN (22:00), Valensiya – ATLeTIKO (22:30), BORUSSIYa D – Union Berlin (22:30), INTeR – Jyenoa (23 fevralga o‘tar kechasi, 00:45), Las Palmas – BARSeLONA (23 fevralga o‘tar kechasi, 01:00)

23 fevral. ReAL – Jirona (20:15), Empoli – ATALANTA (22:00), Kalyari – YuVeNTUS (24 fevralga o‘tar kechasi, 00:45) Lion – PSJ (24 fevralga o‘tar kechasi, 00:45)

24 fevral. ROMA – Monsa (25 fevralga o‘tar kechasi, 00:45).