Surxondaryoda piyodalar yo‘lakchasidan o‘tayotgan 8 yoshli o‘quvchi YTH qurboni bo‘ldi

Bola o‘qigan maktabda YHXB mutasaddilari va o‘quvchilar ishtirokida muhokama yig‘ilishi o‘tkazilgan.

Surxondaryo viloyati Termiz shahrida yuz bergan yo‘l-transport hodisasida yosh bola nobud bo‘lgan. Bu haqda viloyat IIB YHXB axborot xizmati xabar bermoqda.

Ma’lum qilinishicha, hodisa 2025 yil 27 yanvar kuni sodir bo‘lgan. “Nexia” mashinasi haydovchisi qoidalarni buzgan holda harakatlanib, piyodalar yo‘lakchasidan o‘tayotgan 8 yoshli bolani urib yuborgan.

Oqibatda shahardagi 12-maktab o‘quvchisi bo‘lgan bola og‘ir tan jarohatlari olib, halok bo‘lgan.

Qayd etilishicha, bola o‘qigan maktabda YHXB mutasaddilari va o‘quvchilar ishtirokida muhokama yig‘ilishi o‘tkazilgan. Unda o‘quvchilar maktabga kelib-ketishda ehtiyot bo‘lishi va yo‘llarning belgilangan qismidan o‘tishi uqtirilgan.