Iste’molchilardan suv va elektr uchun 12 mlrd so‘m ortiqcha undirilgani ma’lum bo‘ldi

Raqobat qo‘mitasi 2024 yil davomida o‘tkazilgan o‘rganishlarda 200 mingdan ortiq iste’molchilardan turli mahsulotlar va xizmatlar uchun 50 milliard so‘mga yaqin mablag‘ ortiqcha olinganini aniqladi.

Qayd qilinishicha, jumladan, «O‘zsuvta’minot» AJ tomonidan ichimlik suvi uchun narx shakllantirish talablari buzilgani aniqlangan. Oqibatda, iste’molchilardan 7 mlrd so‘mga yaqin ortiqcha mablag‘ undirilgan.

Shuningdek, «Hududiy elektr tarmoqlari» AJ tomonidan Vazirlar Mahkamasining tegishli Nizomi talablari buzilishi oqibatida 5 mlrd so‘mga yaqin ortiqcha mablag‘ undirilgani aniqlangan.

Ta’kidlanishicha, ortiqcha undiruvlar iste’molchilar foydasiga qayta hisob-kitob qilingan.

2024 yil davomida o‘tkazilgan o‘rganishlar natijasida, raqobat qonunchiligi talablari buzilgan 400 dan ortiq holat yuzasidan xo‘jalik yurituvchi sub’yektlarga nisbatan belgilangan tartibda ish qo‘zg‘atilgan.