Hafta o‘rtasidan harorat ko‘tarila boshlaydi

Yakshanba kuni O‘zbekiston hududiga Kavkaz hududlaridan sovuq va nam havo massalarining kirib kelishi boshlandi va u dushanba kuni ham davom etadi, deya xabar bermoqda «O‘zgidromet» agentligi.

3 mart kuni hududning katta qismida qor yog‘ishi davom etadi va havo harorati 0…–5 daraja atrofida bo‘ladi. Kunning ikkinchi yarmida Qoraqalpog‘iston Respublikasi va Xorazm viloyatida qor yog‘ishi to‘xtaydi.

Seshanba kuni O‘zbekistonning barcha viloyatlarida yog‘ingarchiliksiz ob-havo bo‘lishi kutilmoqda. Faqat respublikaning ayrim tog‘li hududlarida biroz qor yog‘ishi mumkin. Kechasi va ertalab sovuq antitsiklon ta’siri saqlanib turadi. Harorat –2…–7 daraja atrofida bo‘ladi.

Kunduzi antitsiklon respublika hududidan asta-sekin chekina boshlaydi. Harorat +4…+7 darajagacha ko‘tariladi, ammo bu mart oyi boshi uchun me’yordan nisbatan pastdir, deyiladi xabarda.

Respublikaning ayrim joylariga tuman tushishi mumkin. 5–6 mart kunlari O‘zbekistonning barcha hududlari bo‘yicha yog‘ingarchiliksiz ob-havo bo‘lishi kutilmoqda. Juma kuni respublika bo‘yicha ba’zi joylarda (Farg‘ona vodiysidan tashqari) yana yomg‘ir ko‘rinishidagi yog‘ingarchilik bo‘lishi kutilmoqda. Faqat O‘zbekistonning shimolida – Ustyurtda va Orol bo‘yi hududlarida yomg‘ir qorga aylanishi mumkin.

Hafta o‘rtasidan harorat jadal ko‘tarila boshlaydi va 6–7 mart kunlariga borib, kechalari +5…+8 darajani, kunduz kunlari +14…+17 darajani, janubda +20…+22 darajani tashkil etadi.

3 mart va 7 mart kunlari respublika bo‘yicha ba’zi joylarda shamol tezligi 17–22 metr/soniyagacha kuchayadi, ayrim joylarda ba’zida 23–25 metr/soniyagacha kuchayishi mumkin.

Toshkent shahrida 3 mart kuni vaqti-vaqti bilan qor yog‘adi. Harorat 0…–2 daraja bo‘ladi. 4–6 mart kunlari yog‘ingarchilik kutilmaydi. 7 martda kechga tomon yomg‘ir yog‘ishi mumkin. Harorat 4 mart kuni kechasi –3…–5 daraja, kunduzi +5…+7 daraja bo‘ladi. 5–7 mart kunlari harorat kechalari +4…+7 darajagacha, kunduz kunlari +14…+17 darajagacha ko‘tariladi.