Misr O‘zbekistonda farmatsevtika sohasida qo‘shma loyihani amalga oshiradi

O‘zbekiston delegatsiyasi Misrdagi yirik Minafarm biofarmatsevtika sohasidagi kompaniyasining yuqori sifatli, arzon dori mahsulotlarini ishlab chiqarish jarayoni bilan tanishib, uning mavjud imkoniyatlari va salohiyatini o‘rgandi.

Kompaniya rahbariyati bilan o‘tkazilgan muzokaralar chog‘ida hamkorlikning istiqbolli yo‘nalishlari muhokama qilindi.

O‘zaro kelishuvga ko‘ra, mazkur hamkorlikning birinchi bosqichida Misr kompaniyasi mutaxassislarining O‘zbekiston farmatsevtika bozorini o‘rganish, tahlil qilish va tegishli loyihani tayyorlash maqsadida mamlakatga safari uyushtiriladi. 

Shuningdek, safar davomida Toshkent viloyati "Parkent" erkin iqtisodiy zonasi hududida dori vositalarini ishlab chiqarishni yo‘lga qo‘yish uchun mahalliy ishchilarni yollash va ularning kasbiy malakasini oshirish ishlari tashkil qilinadi.

Keyingi bosqichda esa Misr kompaniyasi tomonidan sohaga oid ilg‘or texnologiyalarni taqdim etish, distribyutorlik markazi ochish, ishlab chiqarilgan dori vositalarini mamlakatda ro‘yxatdan o‘tkazish, mahalliylashtirish, ishlab chiqarish va xorijga eksport qilish bilan bog‘liq vazifalar rejalashtirilgan.