Oʻzimiz bilan gaplashishimiz aqldan ozish yoki yolgʻizlik belgisi emas, aksincha, bir qator kognitiv va oʻz-oʻzini tartibga solish funksiyalarini bajarishi mumkin, deb xabar berdi Blikk.
Nashrning tushuntirishicha, bu odat vazifani bajarish bosqichlarini tartibga solishga, diqqatni jamlashga yoki nima qilmoqchi ekanimizni oʻzimizga eslatib turishga yordam beradi.
Qayd etilishicha, vazifalarni ovoz chiqarib aytish oʻziga xos yoʻnaltiruvchi vazifasini oʻtashi mumkin. Masalan, agar biror kishi uyni yigʻishtirayotganda yana nimalar qilish kerakligini birma-bir sanab tursa, unga harakatlar ketma-ketligiga rioya qilish osonlashadi va keyingi qadamni unutib qoʻyish ehtimoli kamayadi.
Tadqiqotlarga koʻra, bu odat muayyan vazifalarni bajarishda kognitiv qobiliyatlarni ham yaxshilashi mumkin.
Biroq bu hali hammasi emas, chunki oʻzi bilan suhbatlashish hissiyotlarni tartibga solishda ham muhim rol oʻynashi mumkin.
Oʻz-oʻziga gapirishga bagʻishlangan tadqiqotlarga koʻra, toʻgʻri tanlangan soʻzlar, masalan, ijobiy yoki ruhlantiruvchi soʻzlar ish samaradorligini oshirishi va hatto stressli vaziyatlarni yengib oʻtishga yordam berishi mumkin.
Shunday qilib, uy yumushlarini bajarish paytida ovoz chiqarib oʻylash gʻalati odat emas, balki oʻz-oʻzini tartibga solish va vazifalarni tashkillashtirishning kundalik shakllaridan biridir.
