Slovakiyada yana Fitso va Rossiya bilan do‘stona munosabatga qarshi namoyishlar bo‘lib o‘tdi

Minglab odamlar Slovakiyada bosh vazir Robert Fitsoning rossiyaparast siyosati tufayli iste’fosini talab qilib, yana bir bor namoyishga chiqdi. Namoyishchilar Ukraina va Slovakiyaning Yevropa tanlovini qo‘llab-quvvatladilar, deb xabar berdi Slovakiyaning Aktuality axborot portali 7 mart, juma kuni.

Namoyishlar 40 ta shaharni qamrab oldi

Unga ko‘ra, «Slovakiya – Yevropa» umumiy shiori ostida aksiyalar 40 dan ortiq, jumladan, xorijiy shaharlarda ham bo‘lib o‘tdi. Slovak diasporalari chet elda, masalan, Praga va Amsterdamda namoyishlar o‘tkazdi.

Bratislavadagi mitingda 9-11 ming kishi qatnashdi. Koshitsa shahrida — 15 minggacha. Banska-Bistritsa shahrida — 3-4 ming. Odamlar Yevropa Ittifoqi va NATO bayroqlarini ko‘tarib yurishgan. «Rossiya imperializmini to‘xtating», deb yozilgan shiorlardan birida.

Slovakiyada muntazam namoyishlar

Aktuality ta’kidlashicha, ikki oydan ortiq vaqtdan beri Slovakiyada shunga o‘xshash tadbirlar har ikki haftada bo‘lib o‘tmoqda. Tashkilotchi — «Ukrainaga tinchlik» fuqarolik birlashmasi. 7 mart kuni Bratislavada bo‘lib o‘tgan mitingning farqli tomoni shundaki, uning ishtirokchilari o‘z talablarini ilgari surish uchun nafaqat Fitsoga, balki Slovakiya muxolifatiga ham murojaat qilishgan.

«Ukrainaga tinchlik» assotsiatsiyasi vakillari taxminan 75 ming kishining xayriya mablag‘lari evaziga Ukraina Qurolli kuchlari uchun o‘q-dorilarga 5 million yevrodan ortiq mablag‘ to‘plaganliklarini ma’lum qilishdi. Avvalroq Fitso Slovakiya zaxiralaridan Ukrainaga qurol yetkazib berishni to‘xtatgan edi.