“Hazm qilishni yaxshilaydi, odamni to‘q tutadi” – nisholda qanday tayyorlanadi?

Marg‘ilonlik Anvar ota Ismoilov uchun qo‘li-qo‘liga tegmaydigan kunlar allaqachon kelgan. Muborak Ramazon oyida qandolatchi boshqa ishini yig‘ishtirib, nisholda tayyorlashga o‘tadi. Tayyorlagan nisholdalari vodiy viloyatlaridan tashqari Toshkent va qo‘shni Qirg‘izistonda sotilyapti.

Qandolatchi otaxon nisholda nima uchun Ramazon oyida iste’mol qilinishi-yu, qanday tayyorlanishi haqida so‘zlab berdi:

“Nisholda tayyorlashni 10 yasharligimdan boshlaganman. Bu hunarni rahmatli otam o‘rgatgan. Ramazonda nisholda bejiz iste’mol qilinmaydi. Oshqozonni to‘q tutadi, tanaga foydali. Hazm qilishda oshqozonga ko‘p yordam beradi bu ne’mat. Umumiy qilib aytganda, nisholda tabiiy oqsil hisoblanadi. Nisholdaning tarkibi shakar, yetmak tomiri, tuxumdan iborat. 10 kg nisholda tayyorlash uchun 10 kg shakar, 3 chinni kosada yetmak tomiri suvi va 10 dona tuxum sarflanadi. Yetmak tomirini qaynatib olib sarig‘idan ajratilgan tuxum oqi bilan qo‘shib, mis idishga solinadi va suyuqlik maxsus behi daraxti shoxidan tayyorlangan chilcho‘p bilan uriladi. Ko‘piklar kattalashgach, unga qiyom solinadi. Ma’lum bir jarayondan o‘tgan masalliqlar jamlanmasidan nisholda paydo bo‘ladi.

Texnika asrida yashayapmiz. Avvallari nisholda faqat chilcho‘p bilan urib tayyorlanar edi. Endi esa turli dastgohlar chiqib ketdi. Ko‘pchilik shu dastgohga o‘tib olgan hozir. Lekin chilcho‘pda urib tayyorlangan nisholda ta’mi baribir boshqacha bo‘ladi.

Nisholdalarimiz Farg‘ona, Andijon, Namangan, Toshkent, hatto qo‘shni respublikalarga ham ulgurji narxlarda sotilyapti. 60 yoshni qarshi olyapman. Yaratgan muborak Ramazon oyida kuch-quvvat berib turibdi. Nisholdalar tayyorlab, xalqimiz duosini olib yuribmiz, shukrlar bo‘lsin”, deydi Anvar Ismoilov.

Sarvar Ziyoyev,
Kun.uz
Operator va montajchi – Sardor Mamirov.