2025 yilning boshidan beri Rossiya valutasi dollarga nisbatan 16,4 foizga mustahkamlandi. Bunga asosiy sabab sifatida Rossiya va AQSh o‘rtasidagi muzokaralarning boshlangani hamda xorijiy valutaga nisbatan talabning mavsumiy pasayishi kabi omillar keltirilyapti. Mutaxassislar prognozlariga ko‘ra, yilning ikkinchi yarmidan boshlab yana rubl kursining zaiflashishi boshlanadi.
Joriy yil boshidan buyon rubl kursi sezilarli darajada mustahkamlandi. Xususan, yanvar oyidagi ilk savdolarda 1 dollar 102,3 rublni tashkil etgan bo‘lsa, 15 mart holatiga bu ko‘rsatkich 85,5 rublgacha pasaygan. Umuman olganda, yil boshidan beri Rossiya valutasi dollarga nisbatan 16,4 foizga mustahkamlandi.
Mutaxassislar tahlillariga ko‘ra, bir qancha omillar rubl kursining mustahkamlanishida muhim ahamiyat kasb etyapti.
Geosiyosiy optimizm. Rossiya va AQSh o‘rtasidagi muzokaralarning boshlanishi, amerikaliklar va Ukraina rasmiylari o‘rtasidagi mojaroni hal qilish bo‘yicha aloqalar xorijiy investorlarning Rossiya fond bozoriga kapital kiritishini rag‘batlantiryapti. Shuningdek, AQSh Rossiyaga qarshi sanksiyalarni yumshatish rejasini tayyorlayotgani haqidagi xabarlar paydo bo‘ldi.
Rossiya Markaziy banki oxirgi hisobotida ham rublning mustahkamlanishiga ta’sir qilayotgan asosiy omillardan biri sifatida geosiyosiy keskinlikning pasayishi bo‘yicha ijobiy kutilmalar keltirilgan.
Valuta tushumlarining ko‘payishi. Fevral oyida Rossiyaning eng yirik eksportchilaridan 29 ta kompaniyaning sof savdosi yanvar oyiga nisbatan 25 foizga oshgan va 12,4 milliard dollarni tashkil etgan. Natijada moliya bozorida rubl aktivlariga nisbatan talab oshgan.
Mavsumiy talabning pasayishi. Market Power loyihasi tahlilchilarining qayd etishicha, birinchi chorakda valutaga bo‘lgan talab ham import qiluvchilar, ham aholi o‘rtasida past bo‘ladi. Bu davrda tashqi qarzni to‘lash uchun xorijiy valutaga bo‘lgan ehtiyoj ham yilning boshqa davrlariga nisbatan kamayadi.
Jahon bozorida dollar kursining zaiflashishi.
