Toshkent metropolitenida TTZ dahasigacha yo‘l tortilib, 10 ta bekat quriladi. Bu haqda prezident Shavkat Mirziyoyev 20 mart kuni Toshkent shahrida amalga oshirilayotgan qurilish va obodonlashtirish ishlari bilan tanishuv vaqtida ma’lum qildi.
Tashrif davomida Toshkent shahrida jamoat transportini rivojlantirish loyihalari ham ko‘rib chiqilgan. Ma’lumki, Toshkent metropolitenini Toshkent traktor zavodi dahasigacha olib borish rejalashtirilgan. Prezident avval taqdim qilingan loyihalarni qayta ko‘rib chiqish, boshqa muqobil takliflar kiritish bo‘yicha topshiriq bergan edi.
Shunga muvofiq tayyorlangan yangi loyihaga ko‘ra, metropolitenning Chilonzor yo‘nalishi Toshkent traktor zavodi dahasigacha uzaytirilib, yana 10 ta bekat quriladi. Bu tarmoq 30 ta mahalla, 148 ming aholini qamrab oladi.
Prezident Yunusobod tumanida barpo etilgan High Town City majmuasi bilan tanishdi. U keng qamrovli bo‘lib, savdo va ko‘ngilochar markazi, biznes markazi, mehmonxona va zamonaviy turar joylarni o‘z ichiga olgan.
«Mamlakatda investorlarga yaratilgan qulayliklar tufayli iqtisodiyotda xususiy sektorning ulushi oshib bormoqda. To‘g‘ridan-to‘g‘ri sarmoyalar kiritilib, sanoat, qurilish, savdo, xizmat ko‘rsatish sohalarida istiqbolli loyihalar amalga oshirilmoqda.
Poytaxtning Yunusobod tumanida barpo etilgan High Town City majmuasi shulardan biri. U keng qamrovli bo‘lib, savdo va ko‘ngilochar markazi, biznes markazi, mehmonxona va zamonaviy turar joylarni o‘z ichiga olgan. Bunga 510 million dollar to‘liq xorijiy investitsiya yo‘naltirilgan.
Davlat rahbari savdo markazidagi zamonaviy tijorat va xizmat turlarini ko‘zdan kechirdi. 4 qavatli binoda savdo do‘konlari, jumladan, mashhur brendlarning shoxobchalari ochilgan. Restoran va kafelar, ko‘ngilochar o‘yingohlar, sport maydonlari, kinoteatrlar el xizmatida. Yer ostida avtoturargoh bor.
Bir so‘z bilan aytganda, bu yerda odamlar savdo qilishi, dam olishi, sport bilan shug‘ullanib, vaqtini chog‘ o‘tkazishi uchun barcha sharoitlar yaratilgan. Majmua bir kunda 5 ming kishiga xizmat ko‘rsatish quvvatiga ega. Unda 1 ming 500 kishi ish bilan ta’minlandi», deyiladi prezident matbuot xizmati xabarida.
Prezident majmuaning iqtisodiy ahamiyati va aholi uchun qulayligini e’tirof etib, investor va tadbirkorlarga ko‘mak berish bundan keyin ham davlat siyosatining strategik yo‘nalishi bo‘lib qolishini ta’kidladi. Milliy mahsulotlarni brendga aylantirish, ularni tashqi bozorlarda tanishtirish bo‘yicha mutasaddilarga ko‘rsatmalar berdi.
