Janubiy Koreyada prezident vazifasini bajaruvchiga nisbatan impichment bekor qilindi 

2024 yil dekabrida Janubiy Koreya parlamenti tomonidan impichment e’lon qilingan Janubiy Koreya bosh vaziri Xan Dok Su mamlakat Konstitutsiyaviy sudi qarori bilan o‘z lavozimiga tiklandi. Bu haqda 24 mart, dushanba kuni "Ryonxap" agentligi xabar berdi.

Shu tariqa Xan yana Janubiy Koreya prezidenti vazifasini bajaruvchi bo‘lib, mamlakatda harbiy holat joriy etishga urinishdan so‘ng davlat rahbari lavozimidan chetlashtirilgan Yun Sok Yol o‘rnini egalladi.

Janubiy Koreya prezidenti idorasi Konstitutsiyaviy sud qarorini olqishlab, u parlament o‘z vakolatlarini suiiste’mol qilganini isbotlaganini aytdi. Xan Dok Su prezidentlik lavozimiga qaytganidan so‘ng savdo kabi dolzarb masalalarni hal qilishga va’da berdi, deb xabar qilgan Reuters.

Prezident va uning vorisiga impichmentlar

2024 yil 3 dekabrda Janubiy Koreya prezidenti Yun Sok Yol muxolifatning «davlatga qarshi faoliyati»ni bahona qilib, kutilmaganda mamlakatda harbiy holat e’lon qildi. Biroq mamlakat parlamenti bu qarorni tasdiqlashdan bosh tortdi va ertasi kuni ertalab davlat rahbari uni bekor qilishga majbur bo‘ldi. 14 dekabr kuni xalq vakillari Yunga impichment e’lon qilishdi.

Shundan so‘ng, mamlakat Konstitutsiyasiga muvofiq, amaldagi hukumat rahbari Xan Dok Su prezident bo‘ldi. Biroq 27 dekabr kuni parlament unga ham impichment e’lon qildi. Bunga Xanning mamlakat Konstitutsiyaviy sudiga yana uch sudyani tayinlashdan bosh tortgani sabab bo‘ldi, shunda u nihoyat Yunning lavozimidan chetlatilishini ma’qullay olardi.

Shundan so‘ng mamlakat prezidenti vazifasini vaqtincha bosh vazir o‘rinbosari, moliya vaziri Chxve San Mok bajara boshladi.

Yun Sok Yol hibsdan ozod qilindi

Chetlatilgan prezidentga g‘alayonga rahbarlik qilganlik va hokimiyatni suiiste’mol qilganlik ayblovi bo‘yicha tergov boshlandi. U uch marta gumonlanuvchi sifatida so‘roqqa kelmaganidan so‘ng, sud uni hibsga olish uchun order berdi. 15 yanvar kuni Yun qo‘riqchilarning qarshilik ko‘rsatishga urinishlariga qaramay, o‘z qarorgohida hibsga olingan. Prezident hibsga olinganidan keyin Seulda tartibsizliklar boshlandi.

7 mart kuni Seul markaziy okrug sudi himoyachining Yun Sok Yol haqidagi iltimosnomasini qanoatlantirdi va ilgari chiqarilgan hibsga olish orderini bekor qildi. Bir kundan keyin 64 yoshli siyosatchi hibsdan ozod etildi. Biroq, u tergov ostida qolmoqda.

Yunga qarshi davlat to‘ntarishini tashkil etish ayblovi bo‘yicha sud jarayoni 14 aprel kuni boshlanadi, deb xabar bermoqda Reuters.