Yaponiyada stomatologik klinikalar bemorlarni tinchlantirish uchun terapevt itlarni yollamoqda

Yaponiyada tug‘ilish darajasining pasayishi va biznesdagi kuchli raqobat sharoitida ayrim stomatologik klinikalar itlar xizmatini taklif etishni boshladi. Bu haqda SCMP xabar bermoqda.

Masalan, Yaponiyaning markaziy qismidagi Xonsyu orolida joylashgan Ibaraki prefekturasidagi bolalar stomatologiyasi yigirma yildan beri terapevt itlarni yollab kelmoqda.

Klinika asoschisi Suzuki bu g‘oyani Flora laqabli terapevt it bilan muloqot qilganidan so‘ng qo‘llay boshlagan. U Florani egasi bilan o‘z klinikasiga taklif etganda itning stomatologik mashina shovqinidan va o‘tkir hidlardan qo‘rqmayotganini ko‘rib hayratga tushgan.

Shundan so‘ng Suzuki o‘z klinikasiga ko‘proq terapevt itlarni, ayniqsa kichkina zotdor itlarni jalb eta boshlagan. Bu itlar davolanish paytida bemorning ustida yotishi yoki uning yoniga joylashishi mumkin. Ta’kidlanishicha, hayvonlar butun seans davomida qimirlamaydi.

Aksariyat mijozlarga terapevt itlar bilan muloqot qilish yoqib qoldi, ko‘plab ijobiy fikrlar bildirildi va bu xizmat asta-sekin doimiy xizmat turiga aylandi.

“Itdagi iliqlikni his qilish muolaja paytida bolalarni bo‘shashtiradiganga o‘xshaydi”, — deydi Suzuki.

Klinika ma’lum qilishicha, 20 yil davomida itlar bunday seanslar paytida hech kimga zarar yetkazmagan.

SCMP xabariga ko‘ra, yapon stomatologiya klinikalari mijozlarni jalb qilish maqsadida shifoxonalar hududida restoran va kafelar, fitnes-murabbiylar xizmatini taklif etuvchi sport zallari ochmoqda, shuningdek, hamshiralarni xizmatkor qizlar libosida ishga chiqarmoqda.