JCh-2026 saralashi. Angliyada yirik g‘alaba, yangilangan Litvadan ajoyib kambek va boshqa natijalar

24 mart oqshomida Yevropada JCh-2026 saralash bosqichi doirasida uchta guruhda 2-tur o‘yinlari o‘tkazildi.

K guruhi

Keyn Klozega yetib oldi

Angliya – Latviya 3:0
Gollar: Ris Jyeyms 38, Harri Keyn 68, Eberechi Eze 76.
Angliya: Jordan Pikford, Ris Jyeyms, Mark Gexi, Ezri Konsa, Mayls Lyuis-Skelli (Kayl Uoker 79), Deklan Rays (Jordan Henderson 79), Jud Bellinghem (Fil Foden 67), Jarrod Bouen (Eberechi Eze 61), Morgan Rojyers, Markus Reshford (Kyortis Jons 79), Harri Keyn.

Albaniya – Andorra 3:0
Gollar: Manay 9, 19, Uzuni 90+2

Tomas Tuxel Angliya milliy jamoasi bosh murabbiyi sifatidagi ikkinchi o‘yinida oldingi o‘yindagi boshlang‘ich tarkibdan to‘rt futbolchini almashtirdi. Germaniyalik mutaxassis turli kombinatsiyalarni sinab ko‘rmoqda. Raqiblarning saviyasi bunga imkon beradi. Lekin Latviyaga qarshi o‘yinning birinchi bo‘limida Gutkovskiy inglizlarni jazolab, o‘tkir burchakdan bo‘sh darvozani nishonga olganida, Pikford va Gehining o‘zaro tushunmovchiligi qimmatga tushgan bo‘lardi.

Bo‘lim oxirida esa «Chelsi» himoyachisi, ikki yildan ortiq vaqt davomida asosiy jamoadan chaqiruv olmagan Ris Jyeyms jarima zarbasini ajoyib ijro etib, o‘zining milliy jamoadagi ilk golini urdi va Tuxelning ishonchini oqladi. Bosh murabbiy ishonch bildirishda davom etayotgan «Arsenal»ning 18 yoshli himoyachisi Lyuis-Skelli esa ushbu jarima zarbasini ishlagandi.

Ikkinchi bo‘limda esa Keyn har bir o‘yin uchun majburiy punktni bajarib, navbatdagi golini urdi. Bu safar chiroyli kombinatsiya Raysning ideal uzatmasidan so‘ng Harri bo‘sh qolgan darvozani ishg‘ol qilishi bilan yakunlandi. Bu «Bavariya» forvardining milliy jamoalar miqyosidagi 71-goli bo‘ldi va u germaniyalik Miroslav Kloze bilan tenglashib oldi. Ushbu oqshomdagi so‘nggi so‘zni esa yangi avlod vakili aytdi, zaxiradan o‘yinga qo‘shilgan Eze o‘zini ko‘rsatib, «uch sherlar» safidagi ilk golini nishonladi. Inglizlar jamoasiga yangi qon olib kirayotgan Tuxel saralash bosqichi startidagi ikki o‘yinda yuz foizlik natija qayd etdi, jami besh gol urilib, darvoza daxlsizligi saqlab qolindi.

Oldingi turda inglizlar qarshisida ojiz qolgan albanlar esa bu turda o‘z muxlislari ko‘z o‘ngida Andorrani yirik hisobda taslim etdi. Endi K guruhida Angliya 6 ochko bilan peshqadamlik qilmoqda, Albaniya va Latviyada 3 tadan ochko mavjud.

7 iyun. Andorra — Angliya, Albaniya — Serbiya.
10 iyun. Latviya — Albaniya, Serbiya — Andorra.

Bosniya va Polsha ham yo‘qotishsiz ketmoqda

G guruhi

Litva – Finlandiya 2:2
Gollar: Armandas 39, Gvidas 69 – Kayrinen 3, Yoel 17 pen.

Birinchi turda litvaliklar guruh favoriti bo‘lmish Polshaga jiddiy muammo tug‘dirgandi, uyda finlar bilan kechgan o‘yinda esa tezkor gol o‘tkazib yuborildi. O‘tgan turda Maltaga g‘alaba keltirgan golga (1:0) mualliflik qilgan Antman bu o‘yinda ilk golli vaziyatni yaratdi, Pohyanpaloning zarbasidan keyin himoyachi to‘pni chiziq ustida to‘xtatib qoldi, qaytgan to‘pga esa Kayrinen yetib keldi. Ko‘p o‘tmay yo‘q joydan penalti qo‘yilgach, Litva ikki to‘p farqi bilan ortda qola boshladi.

Ammo Edgaras Yankauskasning yangilangan jamoasi taslim bo‘lmadi. Bo‘lim oxirida Armandas Kuchis yaqin burchakka zarba yo‘llab, hisobni qisqartirdi. U Sloveniyaning sensatsion ravishda Konferensiyalar ligasi chorakfinaliga chiqqan «Sele» klubining asosiy yulduzi hisoblanadi. Litvalik hujumchi ushbu turnirda sakkizta gol urdi. Ikkinchi bo‘limda uzoq masofadan ajoyib zarba yo‘llab, hisobni tenglashtirgan Gineytis esa «Torino» safida A Seriyada o‘ynamoqda. Yaqinda u «Milan»ga qarshi o‘yinda turinliklarga g‘alaba keltirgandi. Shunday ekan, bu siklda litvaliklar ko‘pchilikka boshog‘riq bo‘ladi.

Polsha – Malta 2:0
Gollar: Sviderskiy 27, 51

Karrager esa polshaliklar hujumini to‘xtata olmadi. Bu iborada hech qanday xatolik yo‘q, chunki Malta milliy jamoasida bu saralash siklida Angliya milliy jamoasi va «Liverpul»ning sobiq futbolchisi Jyeymi Karragerning o‘g‘li — Jyeyms ishtirok etmoqda. Kichik Karrager professional darajadagi faoliyatini Shotlandiyaning ikkinchi divizionida «Inverness» safida boshlagandi, bu mavsumda esa ijaradan «Uigan»ga qaytdi. Bu klub hozirda Angliya futbolidagi uchinchi divizionda qatnashmoqda. Jyeyms ushbu orol davlat milliy jamoasiga Maltada tug‘ilgan va keyin Buyuk Britaniyaga ko‘chib borib, ingliz ayoliga uylangan bobosining qoni tufayli jalb etildi.

Varshavadagi o‘yinda Levandovski zaxirada qoldirilgan bo‘lsa-da (u ikkinchi bo‘limda maydonga tushdi) mehmonlar kuchli pressing ostida qolishdi va Jyeyms ham o‘zini yaxshi tomondan ko‘rsata olmadi. Ikkinchi golli hujum aynan uning to‘p uzatishdagi xatosidan keyin boshlandi.

7 iyun. Malta — Litva, Finlandiya — Niderlandiya.
10 iyun. Finlandiya — Polsha, Niderlandiya — Malta.

H guruhi

Bosniya – Kipr 2:1
Gollar: Demirovich 22, Xayradinovich 56 – Pittas 45+2.

San-Marino – Ruminiya 1:5
Gollar: Dzannoni 67 – Chevoli avtogol 6, Popesku 44, Marin 55 pen., Yanis Haji 75 pen., Denis Alibek 90+4.

Bosniya mart oyidagi o‘yinlarni yuz foizlik natija bilan o‘tkazdi, kiprliklar bilan o‘yindagi kamtarona natija esa aldamchi. Bolqon jamoasi ko‘plab vaziyatlar yaratdi va ko‘p hujum qildi, ammo har bir bo‘limda bittadan gol bilan kifoyalandi. Birinchi bo‘lim o‘rtalarida standart vaziyatdan uzatma va Demirovich havodagi to‘pni olis ustun tomon yo‘llashi bilan hisob ochilgandi. Unga assistentlik qilgan Xayradinovich ikkinchi bo‘lim boshlarida g‘alaba goliga mualliflik qildi. Aslida, dushanba kuni Bosniya minimal dasturni bajardi. Muhimi, Ruminiyada g‘alaba qozonish edi (1:0). Ruminlar esa kutilmagan mag‘lubiyattdan so‘ng bor alamini San-Marinodan olishdi (5:1).

7 iyun. Bosniya — San-Marino, Avstriya — Ruminiya.
10 iyun. Ruminiya — Kipr, San-Marino — Avstriya.